მილანი V ლივერპული
ევროპული ფეხბურთის კლასიკა. წყვილი, რომელმაც გვაჩუქა ფეხბურთის ისტორიაში ერთ-ერთი ყველაზე დასამახსოვრებელი შეხვედრა - 2005 წლის სტამბოლის ფინალი. როგორც გვახსოვს, მილანი პირველი ტაიმისთვის ანგარიშით 3:0 იგებდა, მაგრამ 61-ე წუთზე ტაბლოზე უკვე 3:3 ციმციმებდა. ყველაფერი 11-მეტრიანების სერიამდე მივიდა, სადაც საფეხბურთო ფორტუნა ლივერპულისკენ გადაიხარა.
ორი წლის შემდეგ, ეს გუნდები კვლავ შეხვდნენ ერთმანეთს ჩემპიონთა ლიგის ფინალში და გამარჯვებული ამჯერად "როსონერი" გამოვიდა. მართალია, ისე ეპიკურად არა, როგორც "წითლები" ამ მატჩამდე 2 წლით ადრე, მაგრამ რევანში მაინც შედგა. იმის შემდეგ, ამ კლუბების გზები 14 წლის მანძილზე არ გადაკვეთილა.
ჩემპიონთა ლიგის 2021/2022 წლების სეზონის ჯგუფურ ეტაპზე მერსისაიდელებმა "შავ-წითლებთან" ორივე შეხვედრაში იმარჯვეს. რაც შეეხება გუნდების ამჟამინდელ მდგომარეობას, "სქაუზერებმა", ისევე როგორც "ეშმაკებმა", სეზონი ახალ თავკაცთან ერთად დაიწყეს: ალბიონურ გრანდში იურგენ კლოპი ჩაანაცვლა არნე სლოტმა, სან სიროზე კი სტეფანო პიოლის ნაცვლად, პაულუ ფონსეკა მივიდა.
ნიდერლანდელმა მწვრთნელმა ახალი ერა ბრწყინვალედ დაიწყო და პრემიერ ლიგის პირველ სამ შეხვედრაში სამი გამარჯვება მოიპოვა. შემდეგ იყო სანაკრებო პაუზა და სახლში სენსაციური წაგება ნოტინგემ ფორესტთან. პორტუგალიელი თავკაცის სტარტი კი საპირისპიროდ გამოიყურება: 1-ელ 3 ტურში მხოლოდ 2 ქულა, გასულ უქმეებზე კი რეაბილიტაცია ვენეციასთან, ანგარიშით 4:0.
რაც შეეხება ტრანსფერებს, ენფილდელები ზაფხულის სატრანსფერო ფანჯრის დახურვამდე არ აქტიურობდნენ, ბოლოს კი ფედერიკო კიეზა და გიორგი მამარდაშვილი გაიფორმეს. იტალიელ ვინგერს ჯერ არ ჰქონია სლოტის გუნდში დებიუტი და ის არც ფონსეკას კოლექტივის წინააღმდეგ ითამაშებს. ნიდერლანდელი თავკაცის თქმით, ლივერპულის ახალწვეულ შემტევს ჯერ ფორმის აღდგენა სჭირდება.
არ დაგვავიწყდეს, საუბარია ფეხბურთელზე, რომელმაც ძალიან კარგად იცის, თუ რას ნიშნავს მილანის კარში გოლის გატანა.
რაც შეეხება ქართველ მეკარეს, როგორც ვიცით, ის იჯარით ვალენსიაში დარჩა. "წითლების" საკუთრებაში მყოფი გოლკიპერი ნისლიან ალბიონზე 2025 წლის ზაფხულში გადავა, ალისონ ბეკერის სავარაუდო წასვლის შემდეგ.
რამდენიმე საინტერესო ახალი ფეხბურთელით "როსონერიც" შეივსო. პირველ რიგში, გამოსარჩევია ალვარო მორატა, რომელიც ლოს ანჯელესში გადასულ ოლივიე ჟირუს შეცვლის. სატრანსფერო ფანჯრის ბოლო დღეს "შავ-წითლები" ტამი აბრაჰამითაც გაძლიერდნენ. აუცილებლად სათქმელია იუსუფ ფოფანასა და სტრაჰინია პავლოვიჩის ტრანსფერებიც.
"ეშმაკები" ჩემპიონთა ლიგის პირველ დაპირისპირებას საკადრო პრობლემებით ხვდებიან - მარკო სპორტიელო, ალესანდრო ფლორენცი, ისმაელ ბენასერი, დავიდე კალაბრია და მალიკ ტიაუ - ისინი დღეს არ იქნებიან. მერსისაიდელებს კი არ ეყოლებათ ზემოხსენებული კიეზა და ჰარვი ელიოტი. ვნახოთ, როგორი იქნება პორტუგალიელი და ნიდერლანდელი თავკაცების დებიუტი ევროსარბიელზე.
რეალი V შტუტგარტი
რეალს ჩემპიონთა ლიგაზე უმდიდრესი ისტორია აქვს, მათ შორის ბუნდესლიგის წარმომადგენლების წინააღმდეგ, თუმცა შტუტგარტს ევროპის ყველაზე ტიტულოვანი კლუბი აქამდე არასდროს შეხვედრილა. ალბათ, ზედმეტი საუბარია არ სჭირდება იმას, რომ ამ წყვილში გამოკვეთილი ფავორიტი სწორედ მადრიდელები არიან.
მართალია, ლა ლიგაში "სამეფო კლუბი" ჯერჯერობით ვერ ბრწყინავს ისე, როგორც ამას გულშემატკივრები ითხოვენ, თუმცა ჩემპიონთა ლიგაზე ეს გუნდი სულ სხვა ფენომენია, ამის არაერთი მტკიცებულება არსებობს. "შვაბებზე" კი იმის თქმა შეგვიძლია, რომ ეს გუნდი ევროპის ყველაზე პრესტიჟულ საკლუბო ტურნირზე 14-წლიანი პაუზის შემდეგ დაბრუნდა.
იუვენტუსი V პსვ
ჩემპიონთა ლიგაზე დაბრუნდა იუვენტუსიც, თანაც განახლებული. მასიმილიანო ალეგრი შეცვალა ტიაგო მოტამ, რომელმაც გასულ სეზონში ბოლონიას ევროპის ყველაზე პრესტიჟული საკლუბო ტურნირის ისტორიული საგზური მოუტანა. დღეს, იტალიელი ტაქტიკოსი ტურინში მუშაობს და ევროსარბიელზე დებიუტის მოლოდინშია.
რაც შეეხება პსვ-ს, ეს გუნდი ჩემპიონთა ლიგაზე ტრადიციულად კერკეტი კაკალი იქნება. ასე იყო ჯგუფური ეტაპის დროს, ვნახოთ, რას მოუტანს ეინდჰოვენს ახალი ფორმატი. "ბებერი ქალბატონი" და ერედივიზიის გრანდი, პრაქტიკულად, ევროსარბიელის მუდმივი წევრები არიან, მაგრამ ერთმანეთს აქამდე არასდროს შეხვედრიან.
ბაიერნი V დინამო ზაგრები
ბევრი სკეპტიკურად უყურებდა ბაიერნში ვინსენტ კომპანის დანიშნვას, თუმცა ფაქტია, რომ ამ გუნდს ძველი ცივსისხლიანობა არ დაუკარგავს. მიუნხენელთა ანგარიშზე ბუნდესლიგაში 3/3 მოგება არის. საფეხბურთო სამყარომ ლევერკუზენის ბაიერის წაგებაც კი იხილა, მაგრამ გერმანული ფეხბურთის მთავარი ფლანგმანი ჯერჯერობით უშეცდომოა.
"რეკორდმაისტერის" გამარჯვევების სერია, უდიდესი ალბათობით, ჩემპიონთა ლიგაზეც გაგრძელდება, რადგან ობიექტურად, დინამო არ არის ის მოწინააღმდეგე, რომელსაც ამ გუნდისთვის პრობლემების შექმნა შეუძლია. ალბათ, გვახსოვს 9 წლის წინანდელი დაპირისპირება, რომელშიც ბავარიელებმა ზაგრებს 2 მატჩის ჯამში 7:0 მოუგეს.
სპორტინგი V ლილი
გუნდები, რომლებიც ტალანტების აღმოჩენისა და მოგვიანებით მათი სარფიანად გაყიდვის მხრივ, ევროპაში ერთ-ერთი საუკეთესოები არიან. ცხადია, ევროპის ყველაზე პრესტიჟულ საკლუბო ტურნირზე ფავორიტად არ განიხილება არც სპორტინგი და არც ლილი, მაგრამ სიურპრიზების შემოთავაზება ორივე მათგანს შეუძლია.
იანგ ბოიზი V ასტონ ვილა
გასული საუკუნის 80-იან წლებში ასტონ ვილას ევროპის ტოპ გუნდის სტატუსი ჰქონდა და ისტორიას ჩემპიონთა თასზე მათი ტრიუმფიც ახსოვს. იმის შემდეგ, ბირმინგემელები ევროსარბიელზე 10-წლეულების მანძილზე არ ჩანდნენ, მაგრამ 2024 წელს, ნანატრი დაბრუნება შედგა. მეტოქე იანგ ბოიზია, რომლისთვისაც ლიგაზე თამაში უცხო სულაც არ არის.
20:45 - იუვენტუსი-პსვ
20:45 - იანგ ბოიზი-ასტონ ვილა
23:00 - მილანი-ლივერპული
23:00 - რეალი-შტუტგარტი
23:00 - ბაიერნი-დინამო ზაგრები
23:00 - სპორტინგი-ლილი
