კონტეს მოტივაცია
უკანასკნელ თვეებში ბევრმა ადამიანმა გამოთქვა მოსაზრება იმასთან დაკავშირებით, რომ კვარაცხელიამ ნაპოლიში უკვე ამოწურა თავი და მას ახალი გამოწვევა სჭირდებოდა. ამასთან ერთად, ტრიალებდა მოსაზრება, თითქოს "პარტენოპეი" ქართველი შემტევის გარეშე უკეთ თამაშობდა. იტალიური საფეხბურთო საზოგადოების წარმომადგენლებს მოჰყავდათ დავიდ ნერეშის მაგალითი, რომელიც ბევრის აზრით, "ლურჯებში" ხვიჩაზე ეფექტურია.
საქართველოს ნაკრების შემტევი წავიდა, ბრაზილიელ გარემარბს კი აქვს სრული თავისუფლება. ვნახოთ, როგორ გამოიყენებს ეს უკანასკნელი ამ შესაძლებლობას. 23 წლის ვინგერის ტრანსფერის შემდეგ, "აძურიმ" უკვე მოასწრო ერთი მატჩის ჩატარება, დრამატულ ბრძოლაში სტუმრად დამარცხებული იქნა ერთ-ერთი მთავარი კონკურენტი, ბერგამოს ატალანტა.
დავუბრუნდეთ იუვენტუსთან შეხვედრას, რომელიც ძალიან პრინციპული იქნება დიეგო მარადონას ბინადრების მთავარი მწვრთნელისთვის, ანტონიო კონტესთვის. საფეხბურთო კარიერის უდიდესი ნაწილი მან დაუთმო სწორედ ტურინელებს, რომელთა გვერდიგვერდ 420 მატჩი ჩაატარა. სამწვრთნელო კარიერის დაწყების შემდეგ კი იტალიელი ტაქტიკოსი "ბებერ ქალბატონში" კიდევ ერთხელ მივიდა.
როგორც ფეხბურთელმა და როგორც მწვრთნელმა, ნაპოლის ამჟამინდელმა დამრიგებელმა "ბიანკონერისთან" ერთად საერთო ჯამში 18 ტიტული მოიპოვა. ცხოვრების ნახევარზე მეტი 55 წლის ტაქტიკოსმა გაატარა დელე ალპიზე, მაგრამ წლების წინ, ის მილანის ინტერის დამრიგებლედაც მოგვევლინა. სწორედ კონტეს "ნერაძურიმ" დაამხო იუვეს ჰეგემონია კალჩოში.
ვნახოთ, რას იზამს იტალიელი მწვრთნელი ამჯერად "პარტენოპეისთან" ერთად. მისი გუნდი პირველ ადგილზეა, თუმცა უკვე საქართველოს ნაკრების მეშვიდე ნომრის გარეშე. რაც შეეხება პარის სენ-ჟერმენში გადასული ვინგერის შემცვლელს, პრესა "ლურჯების" სახელს ქარიმ ადეიემისა და ალეხანდრო გარნაჩოს უკავშირებს.
მოტას ურთულესი გამოცდა
მასიმილიანო ალეგრის იუვენტუსიდან წასვლის შემდეგ, მისი ადგილი ტიაგო მოტამ დაიკავა. ის ახალ გუნდში მივიდა თანამედროვე და რევოლუციონერი ტაქტიკოსის სახელით, რომელმაც ბოლონია ევროპის ყველაზე პრესტიჟულ საკლუბო ტურნირზე გაიყვანა. ობიექტურად, ვერ ვიტყვით, რომ იტალიელ სპეციალისტს ტურინში გამოსდის ყველაფერი, რასაც ის "როსობლუში" აკეთებდა.
სკუდეტოს ერთ-ერთ მთავარ ფავორიტად შერაცხული "ბებერი ქალბატონი" 21 ტურის შემდეგ, 37 ქულით მეხუთე ადგილზე არის. ლიდერ ნაპოლისთან ჩამორჩენა ამ დროისთვის 13 ქულას შეადგენს. სეზონის დაწყების წინ, აღნიშნულ სცენარს ალბათ ვერავინ წარმოიდგენდა. დიახ, "ბიანკონერი" წაუგებელია, მაგრამ 21 მატჩში 13 ფრეს ფასად.
ალიანსის ბინადრებმა 21 შეხვედრიდან გამარჯვება მოიპოვეს მხოლოდ რვა თამაშში, რაც პროცენტულად სულ რაღაც 38.09-ს უდრის. სერია ა-ს ყველაზე ტიტულოვან გუნდსა და მის ტაქტიკოსს სჭირდებათ რეაბილიტაცია და პრინციპულ მეტოქესთან, თანაც ლიდერთან, სტუმრად მოგება, ამის შესანიშნავი საშუალება იქნება.
