4 თებერვალს, რომან დოლიძე UFC FIGHT NIGHT-ის მთავარ ბრძოლაზე ნასურდინ იმავოვს დაუპირისპირდება - ორთაბრძოლის წინ ქართველმა მებრძოლმა მედიასთან ისაუბრა.
"რა თქმა უნდა სასიამოვნოა, რომ მთავარი ბრძოლა ჩემი იქნება, თუმცა, სხვა მხრივ არაფერი განსაკუთრებული არ ხდება - ვიკლებ წონას, ვსვამ ბევრ წყალს და ვფიქრობ ქართულ საჭმელებზე. ერთადერთ განსხვავებას მედიისგან დიდ ყურადღებაში ვხედავ."
"ვინც კარგად მიცნობს იცის რას ვფიქრობ MMA-ზე და რა ადგილი უკავია ჩემს ცხოვრებაში - მე პატივს ვცემ ორგანიზაციის წესებს. UFC-ს ორი რამ ვთხოვე: ახალი კონტრაქტი და ივენთის მთავარი ბრძოლა - მზად ვიყავი და ვარ ნებისმიერი ოპონენტის წინააღმდეგ გავიდე. მთავარი ბრძოლისთვის 5-6 თვის განმავლობაში ვემზადებოდი და ვფიქრობ, რომ კარგ ფორმაში ვარ. თავს კარგად ვგრძნობ და მზად ვარ 5 რაუნდიანი ორთაბრძოლისთვის."
"UFC-ის ქართველი მებრძოლებისთვის რა თქმა უნდა მნიშვნელოვანი წელია, თუმცა, ჩვენთვის ყოველთვის ასეა. საქართველო პატარა ქვეყანაა, რომელსაც ბევრი პრობლემა აქვს - მე არ ვარ ის ადამიანი, რომელიც საკუთარ ქვეყანაზე იტყვის, რომ იდეალური ან ცუდია - დიახ, ჩვენთან ბევრი პრობლემაა და მინდა, რომ ჩვენი ქვეყნისთვის სამაგალითოები ვიყოთ. აქ ხუთი ქართველი ვართ, რომლიდანაც ოთხი საკუთარი დივიზიონის რეიტინგის ათეულშია, გურამ ქუთათელაძეც იგივეს იმსახურებს. დარწმუნებული ვარ, რომ თებერვალში ილია თოფურიას სახით პირველი ქართველი ჩემპიონი გვეყოლება, ხოლო მერაბ დვალიშვილი ქამრისთვის იბრძოლებს, რაც დიდი ხნის წინ დაიმსახურა."
შეგახსენებთ, რომ თებერვალში UFC-ის ოქტაგონზე სამი ქართველი გამოვა - 4 თებერვალს ღონისძიების მთავარ ბრძოლაში რომან დოლიძე ნასურდინ იმავოვს ეჩხუბება. 18 თებერვალს UFC 298-ზე კი ილია თოფურია ალექსანდერ ვოლკანოვსკის საჩემპიონო ტიტულის მისაკუთრებას შეეცდება, ხოლო მერაბ დვალიშვილი ლეგენდარულ ჰენრი სეჰუდოს დაუპირისპირდება.
დოლიძე: "დარწმუნებული ვარ თებერვალში პირველი ქართველი ჩემპიონი გვეყოლება"
