ჩემპიონთა ლიგის მე-3 ტურში, ბარსელონამ საკუთარ კედლებში ოლიმპიაკოსს უმასპინძლა და მეტოქეს არც მეტი, არც ნაკლები 6-1 მოუგო. კატალონიელებმა ამ მნიშვნელოვანი გამარჯვების შემდეგ, 6 ქულას მოუყარეს თავი და მე-9 პოზიციამდე აღზევდნენ.
ჰანსი ფლიკის გუნდმა ლა ლიგის მომდევნო ტურის მატჩისთვის მზადება უკვე დაიწყო — "ბლაუგრანას" მომდევნო მეტოქე რეალ მადრიდი იქნება. შეგახსენებთ, სეზონის პირველ ელ კლასიკოს სანტიაგო ბერნაბეუ უმასპინძლებს, ეს საკმაოდ საინტერესო დაპირისპირება კი 26 ოქტომბერს, თბილისის დროით 19:15 საათზე გაიმართება.
რა ვითარებაა ბარსელონას ბანაკში რეალ მადრიდთან მატჩამდე რამდენიმე დღით ადრე?
ერთი კარგი ამბავი, რაც უკვე დადასტურდა ისაა, რომ რაფინიამ გუნდთან ერთად ვარჯიში განაახლა და ელ კლასიკოში თამაშს უდიდესი ალბათობით შეძლებს. შეგახსენებთ, ბრაზილიელმა ტრავმის გამო 5 მატჩი გამოტოვა, ახლა კი დაბრუნდა და მზადაა საკუთარ გუნდს დაეხმაროს.
რაც შეეხება ჰანსი ფლიკის წითელ ბარათს, რომელიც გერმანელმა სპეციალისტმა გასულ ტურში მიიღო — მისთვის სამწუხაროდ, ბარსელონას აპელაცია არ დაკმაყოფილდა, რაც იმას ნიშნავს, რომ კატალონიელები სეზონის ერთ-ერთ უმნიშვნელოვანეს მატჩს მთავარი მწვრთნელის გარეშე ჩაატარებენ.
