2025 წლის ევრობასკეტი საქართველოს ნაკრებმა სენსაციური გამარჯვებით დაიწყო. ჩვენმა გუნდმა ევროპის მოქმედ ჩემპიონ ესპანეთს83:69მოუგო.
მატჩის საუკეთესო მოთამაშედ FIBA-მ სანდრო მამუკელაშვილი დაასახელა, რომელსაც სპეციალური პრიზი გადაეცა.
მატჩის შესახებ საქართველოს ნაკრები კალათბურთლებმა ისუაბრეს:
სანდრო მამუკელაშვილი: „დღეს გავიმარჯვეთ, ევროპის ჩემპიონთან მოგება ძალიან გვიხარია, მაგრამ წინ დიდი გზა გვაქვს. ეს გუნდური გამარჯვება იყო. ჩემი აზრით, სწორედ ესაა მთავარი, გამოვიდეთ და გუნდურად ვითამაშოთ. ერთად ვიყოთ და ერთმანეთის გვჯეროდეს. ბედნიერები უნდა ვიყოთ, დღევანდელი თამაშით და მთავარია შემდეგ მატჩებზეც ასეთი მობილიზება გამოვიჩონოთ, რათა ჯგუფიდან გავიდეთ."
თორნიკე შენგელია: "რა თქმა უნდა, ძალიან გახარებულები ვართ ამ გამარჯვებით, მიხარია, რომ დღეს ნაკრებს დავეხმარე. საკუთარ თავზე მეტად გუნდზე ვარ კონცენტრირებული. შესანიშნავი მატჩი ჩავატარეთ, კარგი დასაწყისია. ამაყი ვარ ჩემი გუნდელებით, ჩვენი ნაკრების სამწვრთნელო შტაბით, სტაფითა და რა თქმა უნდა, მადლობა მინდა ვუთხრა ქართველ გულშემატკივრებს, დღეს მოვიდნენ დარბაზში და გვამხნევებდნენ. მათი მხარდაჭერა დღეს ძალიან დაგვეხმარა, რადგან მოდუნების საშუალება არ მოგვცეს."
საქართველოს ნაკრებს მორიგი შეხვედრა 30 აგვისტოს იტალიის ნაკრებთან ელის.
საქართველოს ნაკრების ოფიციალური შემადგენლობა ევროპის ჩემპიონატზე:
რატი ანდრონიკაშვილი, კამარ ბოლდუინი, გიორგი ოჩხიკიძე, კახა ჯინჭარაძე, დუდა სანაძე, ალექსანდრე ფევაძე, თორნიკე შენგელია, სანდრო მამუკელაშვილი, ბექა ბურჯანაძე, გიორგი კორსანტია, გოგა ბითაძე, გიორგი შერმადინი.
საქართველოს ნაკრების მატჩების განრიგი, თბილისის დროით:
საქართველო – იტალია - 30 აგვისტო, 16:00 საათი
საქართველო – საბერძნეთი - 31 აგვისტო, 16:00 საათი
საქართველო – კვიპროსი - 2 სექტემბერი, 19:15 საათი
საქართველო – ბოსნია-ჰერცეგოვინა - 4 სექტემბერი, 16:00 საათი
