ჩავი ერნანდესის პერსპექტივები ბარსელონაში ბურუსით არის მოცული. პრესა უკვე საკმაოდ აქტიურად წერს მისი სავარაუდო შემცვლელების შესახებ. Cadena SER-ის ჟურნალისტმა, მანუ კარენიომ განაცხადა, რომ ესპანელის გაშვების შემთხვევაში, კლუბი არჩევანს ტიაგო მოტასა და რაფა მარკესს შორის გააკეთებს.
"იმ შემთხვევაში, თუ ჩავის გაუშვებენ მიმდინარე სეზონის მსვლელობისას, მდგომარეობის გამოსასწორებლად ბარსელონა მარკესს მოიშველიებს. ლაპორტა ასევე ფიქრობს მოტას კანდიდატურაზეც, მაგრამ კლუბი მასზე უფრო სამომავლო გეგმებს აწყობს. სეზონის უტიტულოდ ჩამთავრების შემთხვევაში, ერნანდესის გაშვება გარდაუვალი იქნება.
სწორედ ამის შემდეგ გადაერთვებიან კატალონიელები ტიაგოზე. მისი კანდიდატურა რაფაელზე მაღლაც კი განიხილება", - განაცხადა ესპანელმა. შეგახსენებთ, "ბლაუგრანას" თავკაცის გაშვება აქტუალური გახდა მას შემდეგ, რაც ესპანეთის სუპერთასის ფინალში მისი გუნდი მადრიდის რეალთან განადგურდა (1:4).
რამდენიმე დღის შემდეგ კი კამპ ნოუს ბინადრები გამოვარდნენ ესპანეთის თასიდანაც, ბილბაოს ატლეტიკთან მარცხის შემდეგ (2:4). რაც შეეხება ლა ლიგაში არსებულ სიტუაციას, ჩავის გუნდი ჩემპიონატის ლიდერს, მეზობელ ჟირონას ამ დროისთვის 8 ქულით ჩამორჩება. არ ვივიწყებთ ჩემპიონთა ლიგასაც, სადაც 22 თებერვალს ბარსა ნაპოლის შეხვდება.
ცნობისთვის, კატალონიელების გარდა, მოტას მსურველები ისედაც არ აკლია და ამას თავისი ლოგიკური მიზეზიც აქვს. სერია ა-ს მიმდინარე სეზონში მისი ბოლონია ერთ-ერთი აღმოჩენაა, რომელიც ჩემპიონთა ლიგის ზონას ამ დროისთვის სულ რაღაც 2 ქულით ჩამორჩება. ტიაგოს სახელს პერიოდულად მილანსაც უკავშირებენ.
რაც შეეხება მარკესს, ის ამჟამად "ბლაუგრანას" სარეზერვო გუნდში მუშაობს. ესპანელი თავკაცის გათავისუფლების შემთხვევაში, მექსიკელი დამრიგებელი კამპ ნოუს მთავარი მწვრთნელის მოვალეობის შემსრულებლის როლში მოევლინება. რა თქმა უნდა, კარგი შედეგების შემთხვევაში, პოსტზე დარჩენის პერსპექტივით.
