იტალიაში მსგავსი პროტესტი ადრეც ყოფილა, რის გამოც არაერთი გარიგება ჩაშლილა.
შორს რომ არ წავიდეთ, ისევ მილანით დავიწყოთ. 2009 წლის იანვარი, ზამთრის სატრანსფერო ფანჯარა, როდესაც კაკა მანჩესტერ სიტიში, ფაქტობრივად, გადასული იყო, მილანის ფანებმა ისტორიაში ერთ-ერთი ყველაზე დიდი საპროტესტო აქცია დაიწყეს, რათა გალიანი შეეჩერებინათ გუნდის სუპერვარსკვლავის გაყიდვისგან.
კურვა სუდის მიერ დაწყებული პროტესტი, ნახევარ ქალაქს გადაედო: "ხელები შორს კაკასგან", "კაკა ხელშეუხებელია", - მსგავსი შინაარსის ბანერები კაზა მილანთან და სან სიროსთან, რამდენიმე დღე იყო გამოფენილი. ინგლისური კლუბი დაახლოებით 120 მილიონ ევროს იხდიდა, რაზეც მილანმა უარი ფიზიკურად ვერ თქვა, თუმცა ერთ საღამოს, მილანის ოფისის ერთ-ერთი ფანჯრიდან, კაკა ფანებს მიესალმა და მისი 22-ნომრიანი მაისური გადმოფინა. იმ მომენტში ყველა მიხვდა, რომ სიტისთან გარიგება ჩაიშალა.
ქალაქ მილანის მეორე ნაწილშიც მომხდარა მსგავსი შემთხვევა, მაშინ ჩაიშალა ე.წ. "გაცვლა" ვუჩინიჩსა და გუარინს შორის. 2014 წლის იანვარში "ნერაძურიმ" და "ბიანკონერიმ" ყველა დეტალი შეათანხმეს, ფეხბურთელები მზად იყვნენ ადგილები გაეცვალათ, მეტიც, ვუჩინიჩმა სამედიცინო შემოწმებაც კი გაიარა, თუმცა ფანების პროტესტმა, ეს ორი ტრანსფერი შეაჩერა. როგორც ინტერის, ისე იუვეს ტიფოზერიამ ამ პოტენციურ გარიგებაზე დიდი პროტესტი გამოხატა, კლუბებმა კი ფანებს მოუსმინეს და ტრანსფერებიც შეაჩერეს.
ეს ინტერი-იუვენტუსს შორის პირველი ჩაშლილი გარიგება არ ყოფილა. 2008 წელს, "ბიანკონერიმ" დეიან სტანკოვიჩის სანაცვლოდ საკმაოდ სოლიდური შეთავაზება გააკეთა, რაზეც ინტერი თანახმა იყო, თუმცა ამ ყველაფერს ფანების დიდი პროტესტი მოჰყვა, რადგან სერბი ნახევარმცველი "ნერაძურის" ერთ-ერთი წამყვანი ფეხბურთელი იყო. შემდეგ იყო იუვენტუსის ფანების განცხადებაც: "ის არ იმსახურებს ჩვენი მაისურის ტარებას."
ტრანსფერი ჩაიშალა, სტანკოვიჩი ინტერში დარჩა, მალე კი მოურინიოსთან ერთად ტრებლი მოიგო.
ჩაშლილ გარიგებებზე საუბრისას, აუცილებლად უნდა გავიხსენოთ 1995 წლის ზაფხული, როდესაც ჯუსეპე სინიორი ლაციოდან პარმაში გადასვლასთან იყო ახლოს. საუბარი 25 მილიონიან გარიგებაზე იყო, თუმცა "ბიანკოჩელესტის" ფანებმა არნახული პროტესტი წამოიწყეს, რასაც ქალაქ რომში დიდი არეულობაც მოჰყვა.
ქუჩაში დაახლოებით 5 000 ადამიანი გამოვიდა, რომელიც საკმაოდ აგრესიულად იყო განწყობილი - მოხდა პოლიციასთან დაპირისპირება, დაზიანდა მაღაზიები და მანქანები, იყო რამდენიმე აფეთქებაც, რამაც ადამიანების ჯანმრთელობა დააზიანა... თუმცა აქ საინტერესო ის იყო, რომ ფანები ორ ნაწილად იყვნენ გაყოფილი - ერთი მხარე სინიორის დარჩენას ითხოვდა, მეორე მხარე კი მას მოღალატეს უწოდებდა. რამდენიმე საათში კი გარიგება ჩაიშალა, ორივე მხარე, როგორც ლაციო, ისე პარმაც, საქმიდან გავიდა და სინიორის პარმაში ტრანსფერიც აღარ შედგა.
Furio Zara © RCS MEDIAGROUP
