ლუის სუარესი (1965/1966 წლების სეზონი)
ინტერის მეათე სკუდეტო და მაისურზე პირველი ვარსკვლავი სუარესს უკავშირდება, რომელიც რომის ლაციოსთან შეხვედრის მთავარად გმირად იქცა. ესპანელმა გამთამაშებელმა გაიტანა გოლი და გამოიმუშავა ავტოგოლი, საბოლოოდ კი მილანელებმა "ბიანკოჩელესტე" 4:1 გაანადგურეს. ამ მოგების შემდეგ, მე-2 პოზიციაზე მყოფმა ბოლონიამ სხვაობის აღმოფხვრის თეორიული შანსი დაკარგა.
ლოთარ მათეუსი (1988/1989)
1989 წლის 28 მაისი - ინტერი ნაპოლის წინააღმდეგ. ტაბლოზე ციმციმებდა 1:1, როდესაც მათეუსმა ზუსტად შესრულებული საჯარიმო დარტყმით მილანელებისთვის სკუდეტოს მომტანი ბურთი გაიტანა. ერთი წლის შემდეგ, გერმანელი შუახაზელი მოიგებს მუნდიალსა და ოქროს ბურთს, მისი გუნდს კი კრიზისული პერიოდი დაეწყება, რომელიც თითქმის 20 წელიწადს გასტანს.
ზლატან იბრაჰიმოვიჩი (2007/2008)
მილანის ლეგენდარული თავდამსხმელის სტატუსის მოპოვებამდე, იბრაჰიმოვიჩმა ისტორია ინტერთან ერთად დაწერა. 2008 წლის 18 მაისი - ის აფორმებს დუბლს პარმას კარში და მილანელებს კლუბის დაარსებიდან 100-წლიან იუბილეზე სკუდეტოს ჩუქნის. იმ დროს ისე ჩანდა, თითქოს შვედი ფორვარდი და "ნერაძური" ერთმანეთისთვის იყვნენ შექმნილები.
დიეგო მილიტო (2009/2010)
2010 - ინტერისა და მილიტოს წელი, როგორც იტალიაში, ისე ზოგადად ევროპაში. სკუდეტოს ბედი წყდებოდა სიენასთან შეხვედრაში, რომლის მთავარი გმირი სწორედ არგენტინელი ფორვარდი აღმოჩნდა. რამდენიმე დღის შემდეგ, ის ევროპის ყველაზე პრესტიჟული საკლუბო ტურნირის ფინალის გმირიც გახდება.
კრისტიან ერიქსენი (2020/2021)
პირველი სკუდეტო 11-წლიანი ჩავარდნის შემდეგ, ასევე ცნობილი, როგორც ანტონიო კონტეს სკუდეტო ინტერს. ყველაფერი გადაწყდა კროტონესთან მატჩში, რომელშიც 68-ე წუთამდე უგოლო ფრე ფიქსირდებოდა. "როსობლუს" კარის გარღვევა შეცვლაზე შემოსულმა კრისტიან ერიქსენმა მოახერხა, საბოლოო წერტილი კი აშრაფ ჰაკიმიმ დასვა.
