დღეს, საქართველოს საკალათბურთო ეროვნული ნაკრები 2027 წლის მსოფლიო ჩემპიონატის საკვალიფიკაციო ეტაპის მომდევნო მატჩს კოპენჰაგენში, დანიის ეროვნული ნაკრების წინააღმდეგ ჩაატარებს. ნოემბერში, მძიმე სტარტის შემდეგ, ალექსანდარ ჯიკიჩის გუნდი სატურნირო ცხრილში სიტუაციის გამოსწორებასა და პირველ გამარჯვებას შეეცდება.
ჩვენი ნაკრების მსგავსად, დანიამაც რთულად დაიწყო საკვალიფიკაციო ეტაპი და საწყის ორ ტურში, ორი მარცხი განიცადა, შესაბამისად, როგორც ჩვენთვის, ისე მასპინძლებისთვისაც ფინალის ტოლფასი მატჩი იქნება.
დანიის ეროვნული ნაკრები დღევანდელ შეხვედრას შეიძლება ითქვას, რომ ოპტიმალური შემადგენლობით ხვდება. იხილეთ 12-კაციანი განაცხადი:
რაც შეეხება საქართველოს ეროვნულ ნაკრებს, დღევანდელ მატჩში ჩვენი გუნდის 12-კაციანი შემადგენლობა ბოლო პერიოდთან შედარებით ცოტათი განსხვავებული იქნება.
მიმდინარე წელს ალექსანდარ ჯიკიჩის გუნდში რამდენიმე ცვლილება მოხდა, შესაბამისად, არსებული შემადგენლობაც გადახალისდა და დანიასთან მატჩში პარკეტზე რამდენიმე ახალწვეულსაც ვიხილავთ.
დღეს შედგება ახალი ნატურალიზებულ ამერიკელი კალათბურთელის დებიუტიც - მარკის რიდი რამდენიმე დღეა, რაც ეროვნულ ნაკრებთან ერთად ვარჯიშობს და სათამაშოდ 100% მზადაა. შეგახსენებთ,ახალი მოთამაშის დამატების აუცილებლობა მას შემდეგ გახდა, რაც გაირკვა, რომ კამარ ბოლდუინი ტრავმის გამო ჩვენს გუნდს ვერ დაეხმარებოდა.
შეგახსენებთ, ჩვენს ნაკრებს დანიასთან ზედიზედ ორი მატჩის ჩატარება მოუწევს. მეორე შეხვედრას უკვე თბილისი უმასპინძლებს - მატჩი 2 მარტს, 21:00 საათზე გაიმართება. დიდი ალბათობით სწორედ ამ მატჩებში გადაწყდება ჩვენი ნაკრები ჯგუფიდან გასვლას შეძლებს თუ არა.
გაგაცნობთ მსოფლიოს 2027 წლის ჩემპიონატის საკვალიფიკაციო ტურნირის ფორმატს: პირველ ჯგუფურ ეტაპზე 2 წრე ჩატარდება და საუკეთესო 3 ნაკრები მომდევნო (ჯგუფურ) ეტაპზე გავა, სადაც ასევე 3 საუკეთერსო სხვა ჯგუფიდან (საბერძნეთი, მონტენეგრო, პორტუგალია, რუმინეთი) გადმოვა და შედგება 6-გუნდიანი ჯგუფი. პირველი ეტაპზე ერთმანეთში ნაჩვენები შედეგები გუნდებს მე-2 ჯგუფში გადაჰყვებათ და იქ მხოლოდ იმ გუნდებს შეხვდებიან, რომლებთანაც მანამდე არ უთამაშიათ (მატჩები 2026 წლის აგვისტო-ნოემბერში და 2027 წლის თებერვალში ჩატარდება). საბოლოო ჯამში, ჯგუფების 3-3 საუკეთესო ნაკრები (ჯამში 12) მსოფლიოს ჩემპიონატზე თამაშის უფლებას მოიპოვებს.
სტატიის ბოლოში, კიდევ ერთხელ შეგახსენებეთ, რომ დანიასთან მატჩი დღეს, ჩვენი დროით 21:30 საათზე დაიწყება.
