გამოძიება რამდენიმე თვის წინ დაიწყო, ფინანსურმა პოლიციამ ყველა ის საბუთი გამოითხოვა, რომელიც კლუბის 2022 წელს გაყიდვასთან არის კავშირში. შეგახსნებეთ, 2022 წლის ზაფხულში "როსონერი" ამერიკულმა რედბერდმა ასევე ამერიკული კომპანია ელიოტისგან შეიძინა. აქ აღსანიშნავია ის ფაქტი, რომ ჯერი კარდინალემ სწორედ ელიოტისგან ისესხა 550 მილიონი ევრო, შესაბამისად, ელიოტმა კლუბზე "უფლებები" ბოლომდე არ დაკარგა, ვინაიდან თუ ვალის დროული დაბრუნება არ მოხდება, კლუბი ისევ მათ მფლობელობაში გადავა.
პირველად გამოძიება მას შემდეგ დაიწყო, რაც კომპანია Blue Skye-ის მფლობელებმა სასამართლოში სარჩელი შეიტანეს, სალვატორე ჩერკიონე და ჯანლუკა დ'ავანცო ელიოტს და რედბერდს იმაზე ედავებოდნენ, რომ მათი თანხმობის გარეშე მოხდა კლუბის გაყიდვა, როცა Blue Skye კლუბის გარკვეულ პროცენტს ფლობდა.
იტალიურ პრესაში იმასაც წერენ, რომ კლუბი კვლავ ელიოტის საკუთრებაშია და არა რედბერდის, რაც საკმაოდ მძიმე ბრალდებაა და თუ ეს დადასტურდა, დიდი ალბათობით, როგორც იტალიის ფეხბურთის ფედერაცია, ისე უეფაც დიდ სანქციებს დაუწესებს კლუბს.
მომდევნო საათებში ამ საქმესთან დაკავშირებით უფრო მეტ სიახლეს შევიტყობთ.
