ფიორენტინა და ბონავენტურა ერთმანეთს დიდი ალბათობით დაემშვიდობებიან

იტალიელი ნახევარმცველის არსებული კონტრაქტი ზაფხულში იწურება. გარკვეული პერიოდი, მხარეები ხელშეკრულების გაგრძელებაზე მუშაობდნენ, თუმცა ახლა მოლაპარაკებები "გაყინულია".

თითქოს სამყარო თავდაყირა დატრიალდა. ჯაკომო ბონავენტურა, ადამიანი, რომელიც ბოლო პერიოდის ფიორენტინას ლიდერი იყო, გოლებს იტანდა, აკეთებდა საგოლე გადაცემებს, დაბრუნდა ეროვნულ ნაკრებში, ახლა კი მოულოდნელად დიდი ინტრიგის ცენტრშია. უკმაყოფილება ორივე მხრიდან, უხეში განცხადებები, რომლებიც პრესისთვის აქტუალურ თემად იქცა. თითქოს ყველაფერი იდეალურად მიმდინარეობდა, ახალი კონტრაქტი ყოველთვის გეგმაში იყო, მაგრამ რაღაც შეიცვალა. ფინანსები? ნაკლები აღიარება თუ სხვა? - ამ მომენტისთვის მოლაპარაკებების შეჩერების მთავარი მიზეზის გარკვევა შეუძლებელია.

ბონავენტურას კლუბთან კონტარქტი ზაფხულში ეწურება, თუმცა ფიორენტინას აქვს უფლება ხელშეკრულება 1 წლით ავტომატურად გააგრძელოს, თუ ერთი პირობა შესრულდება - ფეხბურთელმა ფიორენტინას მიერ ჩატარებული ჯამური მატჩებიდან 70%-ში მაინც უნდა მიიღოს მონაწილეობა. სწრაფი გამოთლა: "ვიოლა" 2023/24 სეზონზე ითამაშებს მინიმუმ 53 თამაშს (ყველა ტურნირის გათვალისწინებით) - მაქსიმუმ კი ეს რაოდენობა 59 თამაშამდე ავა, თუ გასული წლის მსგავსად, კონფერენს ლიგის და იტალიის თასის ფინალში გავიდნენ. ამ მონაცემებით, თუ ჯაკომო დაახლოებით 37-42 მატჩში მიიღებს მონაწილეობას, კონტრაქტი ავტომატურად გახანგრძლივდება. თუმცა სიტუაცია იმდენად შეიცვალა, სჯობს მომდევნო თვეებს დაველოდოთ. ამ მომენტისთვის ბონავენტურას, 33 მატჩიდან 26-ში აქვს მონაწილეობა მიღებული.

დაძაბულობაა ორივე მხარეს: კონტრაქტის ავტომატურად გახანგრძლივების გარდა, მხარეები მის კიდევ 1 წლით გახანგრძლივებაზე მუშაობდნენ (2026 წლამდე). თუმცა, ახლა კლუბსა და ფეხბურთელის გარემოცვას შორის ურთიერთობა ძალიან დაიძაბა. და თუ რამდენიმე დღის წინ ეს ინფორმაცია მხოლოდ ვარაუდი იყო, ენცო რაიოლამ, ფეხბურთელის აგენტმა, ყოველგვარი ეჭვის აღმოფხვრაზე იზრუნა და SportMediaset-სთან კომენტარი გააკეთა:
„ჯერ კიდევ უნდა ვიმსჯელო ჯაკომოსთან, რათა გავიგო, რისი გაკეთება სურს მომავალში. მირჩევნია დროებით გავჩუმდე და ფიორენტინას შესახებ არ ვისაუბრო, სანამ ეს ამბავი არ დასრულდება, რადგან ჩვენ შორის ბევრი რამ ჯერ კიდევ გასარკვევია. ისიც გასათვალიწინებელია, რომ ვსაუბრობთ ადამიანებზე, რომლებიც გარკვეულ საკითხებში ოდნავ უფრო მგძნობიარენი არიან, სწორედ ამიტომ, მინდა თავი ავარიდო ზედმეტ კომენტარებს. მე ყოველთვის ღია ვარ, ჩემი მობილური ტელეფონი სულ ჩართულია... მაგრამ მგონი მხოლოდ ჩემია ჩართული და სხვების არა."

ნორმალურია, რომ ფიორენტინაში ჯერ კიდევ ფიქრობენ, რამდენად საჭიროა ახალი კონტრაქტი ფეხბურთელისთვის, რომელიც მალე 36 წლის გახდება. ამაზე ფიქრი ლეგიტიმურია კიდევ ერთი მიზეზის გამო - იანვარში ფეხბურთელის მიმართ ინტერესი იუვენტუსმა გამოხატა, სადაც ჯაკომოს შეიძლება კარიერის დასრულება სურდეს. თუმცა ყველაფრის მიუხედავად, "ვიოლას" ახლა ბონავენტურას საუკეთესო ვერსია ძალიან სჭირდება, რადგან გუნდის შედეგები არც ისე კარგია. ყველა ელოდება „ძველ“ ჯეკს, რომელმაც სეზონის პირველ ნაწილში გაგვაოცა.

Ilaria Masini © RCS MEDIAGROUP