ამის წინაპირობა ნამდვილად გვაქვს - წლების განმავლობაში, საქართველოს ფორვარდის პოზიციაზე პრობლემა ჰქონდა და გამორჩეულად ბევრი გოლის გამტანი თავდამსხმელი სწორედ არველაძის შემდეგ არ გვყოლია, დღეს კი გვყავს, თან ორი.
ბუდუ ზივზივაძე და ჟორჟ მიქაუტაძე თავიანთ გუნდებში გამორჩეულები არიან. დილით, ზივზივაძემ გაიტანა, საღამოს მიქაუტაძემ და ეს სცენარი წელს რამდენჯერმე განმეორდა.
ამ 2 ფორვარდის თამაშში თვალშისაცემია მათი სტილის დაიხვეწა, ორივე უფრო "ცივსისხლიანი" გახდა და მათ, ვინც შანსს არ აძლევდნენ, დაუმტკიცეს, რა ძალას წარმოადგენენ. ბუდუს და ჟორჟის ისტორია ერთმანეთს ძალიან ჰგავს.
ზივზივაძე 2 წლის წინ უნგრული ფეჰერვარის ძირითადი გუნდიდან იმის გამო მოკვეთეს, რომ მეტოქე გუნდის ფეხბურთელს მაისური გაუცვალა და ჩაიცვა. ბუდუ მეორე გუნდში თამაშობდა. ამ ყველაფრის შემდეგ, წავიდა კარსლსრუეში და სეზონში 11 გოლი გაიტანა. საქართველოს ნაკრებს ევროპის ჩემპიონატზე გასვლაში დაეხმარა, როცა ლუქსემბურგთან დუბლი გაიფორმა და თავისი ბრძოლისუნარიანობით ქვეყანა აალაპარაკა.
გასულ წელს, მიქაუტაძე აიაქსში გადავიდა და ყველას ეს ტრანსფერი გამართლებული გვეგონა, თუმცა იქ მიქაუტაძეს არ ენდობოდნენ, არ ათამაშებდნენ და თუ ათამაშებდნენ, მისთვის არასასურველ პოზიციაზე. ახალგაზრდა ფორვარდი მეცში იჯარით დაბრუნდა, 18 მატჩში 12 გოლი გაიტანა და 4 საგოლე გადაცემა გააკეთა.
თან, ზივზივაძეც და მიქაუტაძეც სუფთა ფორვარდულ გოლებს იტანენ. ბუდუს დღევანდელმა გოლმა უმაღლესი საფეხბურთო IQ დაგვანახა - თამაშის წაკითხვა, ბურთის გატარება, გახსნა და შესრულება ტერფის გარე ნაწილით. ჩვენთან ინტერვიუში მან გვითხრა, რომ თავით თამაში უნდა დაეხვეწა. ზივზივაძე ისეთი შრომისმოყვარე და მიზანდასახულია, რომ მეწმუნეთ, მალე მისგან თავით გატანილ ბევრ გოლს ვიხილავთ.
ფორვარდული ინსტიქტები არც მიქაუტაძეს დაეწუნება. სულ კარზეა "დაგეშილი" და თამაშს გრძნობს, რაც თავდამსხმელისთვის უმნიშვნლოვანესი თვისებაა. გავიხსენოთ მის მიერ გატანილი გოლი გასულ ტურში, როცა კარისკენ არც კი გაუხედავს, ისე შეასრულა ზუსტად. ხშირად იცის მეტოქის მცველებზე ბურთის ჩაჭრა და მსგავს სტილში ბევრი გოლი აქვს გატანილი როგორც ნაკრებში, ისე კლუბში. თუ შეცდომას დაუშვებ, ის აუცილებლად დაგსჯის. მიქაუტაძისნაირი თვისებების მქონე ფეხბურთელი ევროპის ტოპ გუნდშიც თავისუფლად ითამაშებს - ამის დროც მოვა.
მთავარი ისაა, რომ თუ აქამდე საქართველოს ნაკრებში დეფიციტის გამო დიდი თავსატეხი იყო, ვის უნდა ეთამაშა ფორვარდის პოზიციაზე და ამის გამო ხშირად საერთოდ ფორვარდის გარეშე ვთამაშობდით, ახლა პირიქითაა - სანიოლის საფიქრალია საუკეთესოთა შორის ვისზე გააკეთოს არჩევანი.
