ცნობილი ავტორიტეტული გამოცემა MARCA დინამო თბილისის 17 წლის ფეხბურთელს საბა ხარებაშვილს საინტერესო სტატიას უძღვნის:
მარკ გუეჰი, ნიკო პაზი, უსმან დიომანდე, აიუბ ბუადი... ჯერჯერობით ყველაფერი ნორმალურადაა. თუმცა, იანვარში პოპულარულ ვიდეო თამაშში "Football Manager" 10 ყველაზე ხშირად არჩევად მოთამაშეს შორის ერთი სახელი გამოიკვეთა - საბა ხარებაშვილი (თბილისი, 2008 წლის 3 სექტემბერი).
ის უკვე საქართველოს ნაკრებშიც გამოიძახეს- ვილი სანიოლის ხელმძღვანელობით მისი დებიუტი გასული წლის ივნისში ფარერის კუნძულების წინააღმდეგ შედგა და გახდა ყველაზე ახალგაზრდა ფეხბურთელი, ვინც საქართველოს ნაკრებში ითამაშა.
„ასეთ ახალგაზრდულ ასაკში ეროვნულ ნაკრებში გამოძახება დიდი პასუხისმგებლობაა, მაგრამ ამავდროულად, დიდი გამოწვევა და სტიმულია“, - განაცხადა ხარებაშვილმა.
მისი მრავალმხრივი სათამაშო უნარების და დიდი პოტენციალის შედეგად, ხარებაშვილი "Football Manager"-ის ყველაზე მოთხოვნადი ფეხბურთელია.
The Guardian-მა ხარებაშვილი 2008 წელს დაბადებულ 60 საუკეთესო ტალანტს შორის შეიყვანა. ბევრი თვლის, რომ ხარებაშვილს შეუძლია მალე კვარაცხელიას დონის ფეხბურთელი გახდეს. ხარებაშვილი მარცხენა მცველია, თუმცა თავისი შესაძლებლობები კარგად გამოვლინა მარჯვენა ფლანგზეც და 10 ნომერზეც.
კარგი აღნაგობა, შრომისმოყვარეობა, მაღალი ინტელექტი, ზუსტი ჩაწოდებები და კარგი გადასვლები კონტრ-შეტევებზე - ხარებაშვილი ამ თვისებებით გამოირჩევა.
ხარებაშვილი, სულ რაღაც 17 წლის ასაკში, ეროვნული ლიგის ყველაზე ძვირადღირებული ფეხბურთელი გახდა. Transfermarkt-ის მონაცემებით, მისი საბაზრო ღირებულება 1.2 მილიონი ევროა.
Transfermarkt-მა ის უკვე დაუკავშირა ლივერპულს, პსჟ-ს, რეალ მადრიდს და ბარსელონას. თუმცა მისი მომავალი ჯერ უცნობია. საბა აღიარებს, რომ სიამოვნებით ითამაშებდა პრემიერ ლიგაში, მაგრამ რეალ მადრიდის და კრიშტიანუ რონალდუს გულშემატკივარია.
„მან ჩემზე წარუშლელი კვალი დატოვა. ის ჩემი ბავშვობის კუმირია. ხშირად ვუყურებდი მის მატჩებს და ვტკბებოდი“, - ამბობს ხარებაშვილი რონალდუზე..
კარასკოს მეთაურობით, ხარებაშვილის დებიუტი დინამო თბილისის დიდ გუნდში 15 წლის ასაკში შედგა და ამ დროიდან, ის ძირითად შემადგენლობაში სტაბილურად თამაშობს. დინამო თბილისში ხარებაშვილს 58 მატჩი აქვს ჩატარებული და 6 საგოლე გადაცემა შესრულებული.
დაიმახსოვრეთ მისი სახელი და გვარი - საბა ხარებაშვილი
