ჟოზე მოურინიო აღარ არის რომას მთავარი მწვრთნელი, თუმცა მის შესახებ პრესა კვლავ წერს. შეგახსენებთ, რომ 16 იანვრის დილა მწვრთნელისთვის "ჯალოროსიდან" დათხოვნით დაიწყო. პორტუგალიელი სპეციალისტისთვის ეს ღალატის ტოლფასი იყო, განსაკუთრებით გუნდის კაპიტნისგან, ლორენცო პელეგრინისგან.
"მგლების" ყოფილ მთავარ მწვრთნელს მიაჩნდა, რომ სწორედ იტალიელმა შემტევმა ნახევარმცველმა უბიძგა კლუბის ხელმძღვანელობას დამრიგებლის შეცვლისკენ. "განსაკუთრებულსა" და "დედაქალაქელების" კაპიტანს შორის არ შემდგარა საუბარი, მათი გზები უსიტყვოდ გაიყარა, მაგრამ ერთი საინტერესო ფაქტი მაინც მოხდა.
27 წლის შუახაზელმა თავის უჯრაში აღმოაჩინა მოურინიოს ბეჭედი, რომელიც მწვრთნელს 60 წლის იუბილეზე სწორედ რომას ფეხბურთელებმა აჩუქეს. უჯრაში იდო წერილიც, რომელშიც ეწერა: "იმედი მაქვს, ბევრ ტიტულს მოიგებ მომავალში და ასევე ძალიან მინდა, რომ ღირსეული ადამიანი გახდე", - ამ სიტყვებით დაემშვიდობა პორტუგალიელი სპეციალისტი "ჯალოროსის" 7-იანს.
პელეგრინის რეაქციამ არ დააყოვნა, მან მალევე დაურეკა ჟოზეს და მათ შორის დიალოგი შედგა:
- "გავიგე, რომ შენ ურჩიე ფრიდკინს ჩემი გაშვება და დე როსის დანიშნვა", - თქვა "მგლების" ყოფილმა დამრიგებელმა, რაზეც იტალიელმა მოთამაშემ უპასუხა:
- "მსგავსი რამ აზრადაც არ მომსვლია. დილით მოვედი სავარჯიშოდ, თქვენ კი არ დამხვდით".
"განსაკუთრებულმა" და ლორენცომ ერთმანეთს გაუგეს, რის შემდეგაც მეგობრული დამშვიდობებაც შედგა. შეგახსენებთ, რომ ჯერჯერობით უცნობია, თუ სად გააგრძელებს მუშაობას 61 წლის სპეციალისტი. მის სახელს მიუნხენის ბაიერნსა და პრემიერ ლიგის კლუბებს უკავშირებენ. ამის გარდა, აქტუალურია საუდის არაბეთში წასვლის ვარიანტიც.
