უკვე გადაწყვეტილია, რომ მიმდინარე სეზონის ბოლოს, მილანს სტეფანო პიოლი დატოვებს. მისი მომავალი, გარკვეულწილად, დამოკიდებული იყო იმაზე, თუ რას იზამდა "როსონერი" ევროპა ლიგაზე. რომასთან გამოვარდნის შემდეგ კი უკვე ყველასთვის ნათელი გახდა, რომ იტალიელმა დამრიგებელმა თავის ამჟამინდელ გუნდში თავი ამოწურა.
"შავ-წითლებისთვის" სეზონი პრაქტიკულად დასრულებულია. ევროთასებზე აღარ არის ამ გუნდის ადგილი და რაც შეეხება სერია ა-ს, ერთადერთი საზრუნავი მეზობელი ინტერისთვის სასკუდეტო ზეიმის ჩაშხამება იქნება. ლომბარდიელების მიზანი იყო ევროპის ყველაზე პრესტიჟულ საკლუბო ტურნირზე მოხვედრა და უნდა ითქვას, რომ ამ მხრივ ყველაფერი წესრიგშია.
სან სიროს ბინადრები ჩემპიონთა ლიგის ზონიდან ამოვარდებიან მხოლოდ იმ შემთხვევაში, თუ დამარცხდებიან სერია ა-ს ყველა დარჩენილ შეხვედრაში, რაც ობიექტურად, ნაკლებად სავარაუდოა. ერთი სიტყვით, ერთადერთი მოტივაცია მართლაც "ნერაძურისთვის" ჩემპიონობის გადავადებაა, რომელთანაც სხვაობა ამ დროისთვის 14 ქულას შეადგენს.
დერბი დელა მადონინას შესახებ მოგვიანებით ვისაუბრებთ, იქამდე კი განვიხილოთ, თუ რა ელით მილანსა და პიოლის ერთმანეთის გარეშე. ის არ დარჩება უმუშევარი, იტალიელი დამრიგებლის სახელს უკვე უკვავშირებენ ნაპოლის, რომელიც იგივე "როსონერის" მსგავსად, ასევე ახალი სპეციალისტის ძიებაშია.
"შავ-წითლები" თავის მხრივ ეძებენ მწვრთნელს, რომელთან ერთადაც შეძლებენ ევროთასებზე ღირსეულად გამოსვლასა და სერია ა-ში ქულებს აღარ გაფლანგავენ. სტეფანო ამას ვერ ახერხებდა. როგორც აღვნიშნეთ, "შავ-ლურჯებთან" ჩამორჩენა შეადგენს 14 ქულას, ევროპა ლიგაზე ლომბარდიელები გამოვარდნენ "ჯალოროსისთან" მატჩში, კოპა იტალიაზე კი ბერგამოს ატალანტასთან მატჩში.
სან სიროს ბინადრების შემადგენლობა ზემოაღნიშნულ სამეულს არაფრით ჩამოუვარდება, განსხვავება ის არის, რომ იქ ძალიან კარგად სწორედ მწვრთნელის ფაქტორი მუშაობს. სიმონე ინძაგი მეაცაზე თანამედროვე იდეებით მივიდა და მისი ხედვა ნამდვილად მუშაობს. დანიელე დე როსიმ "მგლებს" ახალი სული ჩაბერა და მასზე უკვე საუბრობენ, ისე როგორც მომავლის სპეციალისტზე.
ჯან პიერო გასპერინისა და "შავ-ლურჯების" ქიმია კი უკვე კლასიკაა. მსგავსი რამ პიოლის გუნდში არ შეინიშნებოდა. შეგვიძლია ასევე მოვიყვანოთ ჩემპიონთა ლიგიდან გამოვარდნის ფაქტიც. დიახ, მილანი განთესილი იყო სიკვდილის ჯგუფში, სადაც მეტოქეები იყვნენ პარის სენ-ჟერმენი, დორტმუნდის ბორუსია და ნიუკასლი.
დღევანდელ პსჟ-სთან "როსონერის" შედარება უადგილოა, თუმცა არა ვესტფალიელებთან, რომლებიც ჩემპიონთა ლიგის ნახევარფინალში გავიდნენ. ისმის კითხვა: როგორ მოხვდნენ "შავ-ყვითლები" იგივე სიკვდილის ჯგუფიდან ევროპის 4 საუკეთესო გუნდს შორის, მაშინ, როდესაც "შავ-წითლები" პლეიოფამდეც კი ვერ გავიდნენ?
სიგნალ იდუნა პარკის ბინადრებს ხომ ჰყავდათ იგივე მოწინააღმდეგეები, რაც პიოლის გუნდს. მერვედფინალში მათ შეხვდათ პსვ ეინდჰოვენი და თუ ამ გუნდთან მოგებაში არაფერია განსაკუთრებული, შემდეგ ეტაპზე ედინ ტერზიჩის კოლექტივმა ბრძოლას გამოთიშა თვით მადრიდის ატლეტიკო, რომელსაც იგივე ინტერმა ვერაფერი მოუხერხა.
დორტმუნდის შემადგენლობა სან სიროს ბინადრების შემადგენლობაზე ძლიერია? - არა! მართალია, იტალიური გუნდი საკადრო პრობლემებს განიცდის, მაგრამ ვერ ვიტყვით იმას, რომ მილანი სუსტია, ევროპული სტანდარტებითაც კი. შემადგენლობის გაძლიერებაზე 120 მილიონი დაიხარჯა, მაგრამ "როსონერი" იგივე დონეზე დარჩა, რაც წინა წლებში იყო.
არ დაგვავიწყდეს ის ფაქტი, რომ ტურინის იუვენტუსის გარშემო აგორებული სკანდალი რომ არა, "შავ-წითლები" ჩემპიონთა ლიგაზე ვერც მოხვდებოდნენ. ლომბარდიელებზე მაღლა სეზონი ნაპოლიმ დაასრულა, თანაქალაქელებმა, დაჯარიმებულმა "ბებერმა ქალბატონმა" და რომის ლაციომ. პირველი 3 გუნდი გასაგებია, მაგრამ რამდენად მიზანშეწონილია "ბიანკოჩელესტეს" სან სიროს ბინადრებზე წინ ყოფნა?
პიოლის არ ვუკარგავთ დამსახურებებს, მას ნამდვილად ჰქონდა რამდენიმე დიდებული მომენტი - სერია ა-ს ჩემპიონობა, ჩემპიონთა ლიგაზე დაბრუნება და შემდეგ 1/2 ფინალში თამაში, ასევე წაუგებელი სერია. ზოგადად, მილანის კრიზისიდან გამოსვლა დაიწყო იტალიელ დამრიგებელთან ერთად, მაგრამ ადრე თუ გვიან ხომ ყველაფერი სრულდება...
სტეფანომ "როსონერის" თანამედროვე ისტორიაში უკვე შეიტანა თავისი სახელი, თუმცა ახლა ცვლილებების დროა. პრესაში უკვე დაიწერა რამდენიმე კანდიდატის შესახებ და მათ შორის ყველაზე სახელოვანი ანტონიო კონტე არის. რაც შეეხება "შავ-წითლების" ამჟამინდელ დამრიგებელს, როგორც აღვნიშნეთ, მის სახელს "პარტენოპეის" უკავშირებენ.
ზაფხულში ყველაფერი გაირკვევა, დაველოდოთ მოვლენების განვითარებას. საინტერესოა, როგორი იქნება ლომბარდიელების ახალ საფეხურზე გადასვლის ნაბიჯი. ჩვენთვის გარკვეული მიზეზების გამო, ასევე დიდ ინტერესს იწვევს 58 წლის დამრიგებლის შესაძლო დანიშნვა "აძურიში", ფრანჩეკო კალცონას ნაცვლად.
აურელიო დე ლაურენტისის ოცნების კანდიდატი ასევე კონტეა, მაგრამ ნაკლებად სავარაუდოა, რომ ორმა ექსცენტრიულმა პიროვნებამ ერთმანეთს გაუგონ. იტალიელი ტაქტიკოსი არ მოითმენს თანამემამულე ბიზნესმენის ოდიოზურობას, ის ეცდება საკუთარი წესების დამკვიდრებას და ამ მხრივ, "ლურჯებში" სწორედ პიოლის დანიშნვა ჩანს უფრო რეალური.
