საქართველოს კალათბურთელთა ნაკრები მსოფლიოს ჩემპიონატის საკვალიფიკაციო ეტაპის მორიგი მატჩისთვის მასპინძელ დანიაში ვარჯიშს აგრძელებს.
თბილისიდან კოპენჰაგენში ჩასულ სუპერლიგის ხუთ მოთამაშეს, გიორგი ოჩხიკიძე, კახა ჯინჭარაძე, ალექსანდრე ფევაძე, ვილი ისიანი, გიორგი ტურძილაძე და ნატურალიზებულ ამერიკელ მარკის რიდს სასტუმროში ლეგიონერები დახვდნენ, ნაწილიც მოგვიანებით ჩამოვიდა და 24 თბერვლისთვის ალეკსანდარ ჯიკიჩის განკარგულებაში 13 კალათბურთელი იყო.
ნაკრებს დანიაში შეუერთდნენ ესპანეთში მოთამაშე კალათბურთელები – დუდა სანაძე, ბექა ბურჯანაძე, მათე ხატიაშვილი, გიორგი კორსანტია, ისლანდიაში მოთამაშეები – რატი ანდრონიკაშვილი, ცოტნე ცარციძე და ბელგიური ოსტენდეს წევრი, ალექსანდრე მერკვილაძე.
ფარუმ არენა 4000 მაყურებელს იტევს და ის მხოლოდ ეროვნული ნაკრების თამაშებისთვის გამოიყენება. ჩვეულებრივ კი დარბაზის შენობაში საბავშვო ბაღი ფუნქციონირებს და მოედანი სპორტული გაკვეთილებისთვის გამოიყენება. იქ თამაშობენ ხელბურთს, ფრენბურთს, ფუტსალს, თუმცა ფრუმ არენა არც ერთ საკალათბურთო გუნდს არ ეკუთვნის და როგორც ვთქვით, იქ მხოლოდ სანაკრებო თამაშები იმართება.
დანიასთან მატჩამდე, ალეკსანდარ ჯიკიჩს 3 სრულყოფილი ვარჯიში აქვს მოსამზადებლად და არც ერთ მათგანში არ იქნება თორნიკე შენგელია. ნაკრების კაპიტანი 26 თებერვალს, ბოლო ვარჯიშის დღეს ჩამოვა და გუნდთან ერთად მხოლოდ მატჩის დღეს, ეგრეთ წოდებულ შუთერაუნდზე ივარჯიშებს.
საქართველოს ნაკრები დანიას 27 თებერვალს კოპენჰაგენში დაუპირისპირდება. მორიგი 2 მატჩის მნიშვნელოვნის იმსითვის რომ ჩვენმა გუნდმა მომდევნო ეტაპზე ასპარეზობა გააგრძელოს. საქართველოსა და დანიას ორ-ორი მატჩი აქვთ ჩატარებული და ჯერ მოგება არ მოუპოვებიათ. ჯგუფიდან სამი საუკეთესო გადის.
მსოფლიოს 2027 წლის ჩემპიონატის საკვალიფიკაციო ტურნირის ფორმატი: პირველ ჯგუფურ ეტაპზე 2 წრე ჩატარდება და საუკეთესო 3 ნაკრები მომდევნო (ჯგუფურ) ეტაპზე გავა, სადაც ასევე 3 საუკეთერსო სხვა ჯგუფიდან (საბერძნეთი, მონტენეგრო, პორტუგალია, რუმინეთი) გადმოვა და შედგება 6-გუნდიანი ჯგუფი.პირველი ეტაპზე ერთმანეთში ნაჩვენები შედეგები გუნდებს მე-2 ჯგუფში გადაჰყვებათ და იქ მხოლოდ იმ გუნდებს შეხვდებიან, რომლებთანაც მანამდე არ უთამაშიათ (მატჩები 2026 წლის აგვისტო-ნოემბერში და 2027 წლის თებერვალში ჩატარდება). საბოლოო ჯამში, ჯგუფების 3-3 საუკეთესო ნაკრები (ჯამში 12) მსოფლიოს ჩემპიონატზე თამაშის უფლებას მოიპოვებს.
შეგახსენებთ საქართველოს ნაკრებმა მსოფლიოს ჩემპიონატზე ერთხელ უკვე ითამაშა, ჩვენი ნაკრები 2023 წელს საუკეთესო 16 გუნდში მოხვდა.
ფოტო: საქართველოს კლათბურთის ფედერაცია
