ჯერი კარდინალე, ამერიკელი მილიარდელი, რომელიც მილანში 2022 წლის ზაფხულში მოვიდა, დღემდე ვერ ახერხებს ფანების გულის ბოლომდე მოგებას. თან მოსვლაც არის და მოსვლაც, ერთ-ერთი პირველი ნაბიჯი პაოლო მალდინის გუნდიდან გაშვება იყო. ეს ყველასთვის შოკი აღმოჩნდა, არ აქვს მნიშვნელობა მილანის ფანი ხარ თუ არა, მთელმა საფეხბურთო სამყარომ ეს ამბავი საკმაოდ რთულად მიიღო. კლუბში მოსვლიდან არასრულ 1 წელში გუნდიდან უშვებ ადამიანს, რომელიც მილანთან ასოცირდება, ამას ბევრი ნამდვილად ვერ გაბედავდა. შემდეგ იყო სანდრო ტონალის გაყიდვა, ადამიანის რომელიც დაბადებიდან მილანთან იყო კავშირში, ფანების ნომერ პირველი სიყვარული... მაგრამ როგორც მალდინი, ისე ტონალიც უმარტივესად „მოიშორა“ გუნდმა, თან საკმაოდ სარფიანად. შემდეგ რაც სანდროს თავს მოხდა, კარდინალეს და მისი გუნდის "მინი გამარჯვებად" შეირაცხა, მაგრამ ფანების უმეტესობა ფეხბურთელის გუნდიდან გაშვებას, დღემდე ვერ ეგუება.
მალდინის და ტონალის შემდეგ სიტუაცია ოდნავ ჩაწყნარდა, ზაფხულის სატრანსფერო ფანჯარაზე გუნდმა საკმაოდ სოლიდური თანხა დახარჯა... სოლიდური იტალიისთვის, თუმცა €130+ მილიონს ინგლისში ერთ ფეხბურთელში იხდიან ხოლმე, მილანმა კი ამ თანხად თითქმის ახალი გუნდი შეკრა. ამ პერიოდის განმავლობაში ხელშეუხებელი რჩებოდა სტეფანო პიოლი, რომელსაც თავის დროზე პაოლო მალდინის დიდი მხარდაჭერაც ჰქონდა, თუმცა მისი გაშვების შემდეგ, პიოლისგან იგივე მესიჯები ნაკლებად წამოვიდა. პიოლიმ უბრალოდ თავისი საქმის კეთება გააგრძელა და კლუბში მიმდინარე პროცესებს თავი აარიდა.
2023/24 სეზონი გუნდმა თითქოს კარგად დაიწყო - იყო მოგებები, ახალმა ფეხბურთელემა გოლების გატანა დაიწყეს, თუმცა შემდეგ ის მოხდა, რამაც სეზონის ბედი თითქმის გადაწყვიტა, მილანი გაჩერდა, გუნდმა პირველი დიდი კრიზისი ვერ გადაიტანა. იუვენტუსთან მარცხი, უდინეზესთან მარცხი, ლეჩესა და ნაპოლისთან 2-ბურთიანი უპირატესობის განიავება და ვერ მოგება, რასაც მალევე ატალანტასთან წაგება და მთავარი, განადგურება დერბი დელა მადონინაში მოჰყვა. 5:1 ანგარიშით წაგებული მატჩი მეზობელ ინტერთან და სრულიადნ მოშლილი გუნდი, აქ დასრულდა "როსონერის" 2023/24 სეზონი...
შემდეგ იყო ჩემპიონთა ლიგის ჯგუფში ჩარჩენა და ყველამ ისევ თავიდან დაიწყო კარდინალესა და მისი გუნდის კრიტიკა, რომელიც ამ დრომდე არ გაჩერებულა. ერთი მხარე პიოლის ამ დრომდე გუნდში გაჩერებას აპროტესტებს, მეორე მხარე ისევ მალდინი-ტონალიზე საუბრობს, მესამე მხარეს კი უბრალოდ მომავლის იმედი აღარ აქვს... და ამ დროს გუნდში ძველი მეგობარი ბრუნდება, შვედი ლეგენდა, რომელიც კლუბის ისტორიაში შევიდა, ზლატანი მილანში უკვე მეორედ დაბრუნდა, ოღონდ ამჯერად არა ფეხბურთელის სტატუსით, არამედ იმ ადამიანის დამხმარედ, რომელიც ქალაქ მილანის შავ-წითელ მხარეში დიდად არ უყვართ.
იბრა მილანში რედბერდის საშუალებით მოხვდა, ის კლუბში პირდაპირი მნიშვენლობით არ დაბრუნებულა, თუმცა კლუბის მფლობელ ორგანიზაციაში ერთ-ერთი წამყვანი პოზიცია დაიკავა. როგორც პრესაში თავიდან წერდნენ, მისი მოვალეობები კლუბში აქტიურ ჩარევას არ ითვალისწინებდა, მაგრამ დრომ სულ სხვა რამე გვანახა. ზლატანი იმაზე მეტად ჩაერთო კლუბის საქმიანობაში, ვიდრე ამას თავიდან ვარაუდობდნენ. მილანში დაბრუნების შემდეგ, იბრა უმეტეს დროს მილანელოზე და მილანის მატჩებზე ატარებს. არ აქვს მნიშვნელობა გუნდის თამაში სან სიროზეა თუ გასვლაზე, სხვა ქალაქში. ზლატანი გახდა კარდინალეს ხმა კლუბში.
"ზაფხულში ცვლილებები იქნება და მე ზლატან იბრაჰიმოვიჩს ბოლომდე ვენდობი, ის ჩემი ხმა იქნება მილანში - კლუბში, გასახდელში, მოედანზე... საერთოდ ყველგან. მასზე დიდი ძალაუფლება არავის ექნება, ზლატანს ჩემგან სრული ნდობა აქვს", - ეს სიტყვები ჯერი კარდინალეს ეკუთვნის, რომელმაც რამდენიმე კვირის წინ ყველას დაანახა, რომ მილანის ბედი ადარდებს და მის მომავალს აბარებს იმ ადამიანს, რომელიც ფანებს ძალიან უყვართ.
ზლატანი არ იქნება ერთი ჩვეულებრივი პირი ახალ მილანში, ის იქნება მთავარი ადამიანი, მისი სიტყვა იქნება გადამწყვეტი - ეს იქნება მწვრთნელის საკითხი, ახალი ტრანსფერები თუ სხვა.
"კარდინალეს შემოთავაზებაზე უარს ფიზიკურად ვერ ვიტყოდი, მან მილანში დაბრუნების შესაძლებლობა მომცა, რაზეც მარტივად დავთანხმდი. ეს კლუბი ჩემთვის ბევრ რამეს ნიშნავს. დიდი ამბიციები მაქვს და ვეცდები, კლუბს დავეხმარო. მომწონს ეს პასუხისმგებლობა და მინდა რაც შეიძლება მეტი მივცე ამ კლუბს. თავს მილანში კარგად ვგრძნობ", - იბრაჰიმოვიჩი.
ზლატანი ფეხბურთს იმაზე ადრე დაუბრუნდა, ვიდრე ამას თვითონ ვარაუდობდა. მილანში დაბრუნებას არც განიხილავდა, სულ სხვა გეგმები ჰქონდა, მაგრამ კარდინალემ მისი დათანხმება მაინც შეძლო და როგორც ჩანს, იბრაც საკმაოდ მოწადინებულია.
იბრა საუბრობს როგორც მენეჯერი, თუმცა კიდევ ერთხელ უნდა აღინიშნოს, რომ ფორმალურად ეს მისი პოზიცია არ არის. ზლატანი მრჩეველია, უფრო სწორად კონსულტანტი. ის შეიძლება იყოს "სუპერ კონსულტანტი", მილანში ასე პირდაპირ არ მუშაობს, მაგრამ მისი მოვალეობა ზუსტადაც რომ ამ კლუბის განვითარებაა. ის პირდაპირ ექვემდებარება კარდინალეს და, გარდა როსონერიში მუშაობისა, ასევე ჩართულია RedBird-ის ბიზნესშიც. ჩვენ შეგვიძლია მას ვუწოდოთ, მენეჯერი წოდებების გარეშე.
იბრა საუბრობს როგორც მენეჯერი, თუმცა კიდევ ერთხელ უნდა აღინიშნოს, რომ ფორმალურად ეს მისი პოზიცია არ არის. ზლატანი მრჩეველია, უფრო სწორად კონსულტანტი. ის შეიძლება იყოს "სუპერ კონსულტანტი", მილანში ასე პირდაპირ არ მუშაობს, მაგრამ მისი მოვალეობა ზუსტადაც რომ ამ კლუბის განვითარებაა. ის პირდაპირ ექვემდებარება კარდინალეს და, გარდა როსონერიში მუშაობისა, ასევე ჩართულია RedBird-ის ბიზნესშიც. ჩვენ შეგვიძლია მას ვუწოდოთ, მენეჯერი წოდებების გარეშე.
ზლატანმა პიოლის ნდობა კიდევ ერთხელ გამოუცხადა, როდესაც საუდის არაებთში ფორმულა 1-ს ესწრებოდა:
"ის ჩვენი მწვრთნელია და მუშაობა ისე უნდა გააგრძელოს როგორც აქამდე, მას ბოლომდე ვენდობით.“
ეს სიტყვები ნამდვილი მეჯერის სიტყვებს ჰგავს, დროული და საჭირო, იმ დროს როცა გუნდს არც ისე კარგი პერიოდი უდგას. არავინ იტყვის შუა სეზონში, რომ ზაფხულში მწვრთნელის შეცვლა იგეგმება, მაგრამ ფაქტია, უფროსობა ამას სერიოზულად განიხილავს. სხვა თუ არაფერი, დიდი ცლილებები თავად კარდინალემ დაანონსა.
იბრას რომ კონტეს ვარიანტი ძალიან მოსწონს, ეს კარგად ვიცით. ზლატანს ასევე ტიაგო მოტას კანდიდატურაც იზიდავს, თან აქ საქმე ძველ მეგობრებთან გვაქვს. პიოლი? - მისი მომავალი თავიდან ბოლომდე ევროპა ლიგაზე და ჩემპიონატში მეორე ადგილზეა დამოკიდებული. პრესას თუ დავუჯერებთ, მისი ისტორია დასასრულს უახლოვდება, მაგრამ ჯერ არაფერია გადაწყვეტილი, სტეფანოს რთულ პერიოდებში არაერთხელ გაუჩუმებია ყველა კრიტიკოსი. როსონერი ამ მომენტისთვის მეორე ადგილზეა, ევროპა ლიგაზე კი გუნდი წარმატებულ სვლას აგრძელებს.
და ბოლოს, გუნდის გაყიდვა - ამას კარდინალე სერიოზულად განიხილავს, მაგრამ არა 100%-იანი წილის, არამედ გარკვეული პროცენტის დათმობაზეა საუბარი. იმის მიუხედავად, რომ გუნდის პრეზიდენტი და აღმასრულებელი დირექტორი კლუბის შესაძლო გაყიდვაზე სიახლეებს ყოველ მეორე ინტერვიუში უარყოფენ, RedBird-ში პარტნიორებს ეძებენ. ამას ისიც ემატება, რომ კარდინალეს მალე კომპანია ელიოტის ვალი აქვს დასაფარი, კერძოდ €550 მილიონი, პლიუს კლუბმა ახალი სტადიონის პროექტიც დაიწყო, შესაბამისად, ახლა დამატებით ფინანსები ძალიან საჭიროა. ზლატანი კლუბის წილის შესაძლო გაყიდვასთან დაკავშირებით საუდის არაბეთში იმყოფებოდა, სადაც პოტენციურ მყიდველებთან შეხვედრები გამართა. ამის მეტი დეტალი ჩვენთვის ჯერჯერობით უნცობია, მაგრამ ფაქტია, მილანში სერიოზული ძვრები დაიწყო, რის სათავეშიც ზლატან ირბაჰიმოვიჩი დგას, ადამიანი, რომლის იმედიც გუნდის ფანებს აქვთ, დანარჩენს კი დრო გვიჩვენებს.
