რამდენიმე საათში საქართველოს ხელბურთლთა ნაკრები ზედეზედ მეორე ევროპის ჩემპიონატზე ასპარეზობას დაიწყებს.
2026 წლის ევროპის ჩემპიონატი დანიაში, შვედეთსა და ნორვეგიაში ტარდება. შეჯიბრებაში ევროპირველობაზე 24 ქვეყანა მონაწილეობს.
საქართველოს ხელბურთელთა ნაკრები შვედეთის ქალაქ მალმეში ითამაშებს. ჩვენ გუნდთან ერთად E ჯგუფში შვედეთის, ხორვატიისა და ნიდერლანდების ნეკრებები იასპარეზებენ.
საქართველოს ნაკრები ევროპის ჩემპიონატზე პირველ შეხვედრას, 17 იანვარს, 2025 წლის მსოფლიოს ჩემპიონატის ფინალისტ, ოლიმპიური თამაშების ორგზის ჩემპიონ, 2003 წლის მსოფლიოს ჩემპიონ და მრავალგზის ევროპისა და მსოფლიო ჩემპიონატების ვერცხლისა და ბრინჯაოს პრიზიორ ხორვატიასთან გამართავს.
სწორედ საქართველოსა და ხორვატიის შეხვედრით გაიხსნება E ჯგუფი.
ჩვენი გუნდი 19 იანვარს ევროპის ხუთგზის და მსოფლიოს ოთხგზის ჩემპიონ, არაერთი ვერცხლისა და ბრინჯაოს მედლის მფლობელ და ოლიმპიური თამაშების ოთხგზის ფინალისტ, მასპინძელ შვედეთს დაუპირისპირდება.
21 იანვარს კი ევროპისა და მსოფლიო ჩემპიონატების სამგზის მონაწილე ნიდერლანდებთან ითამაშებს.
საქართველოს ხელბურთელთა ნაკრების დებიუტი ევროპირველობაზე 2024 წელს შედგა. ჩვენმა გუნდმა ჯგუფური ეტაპი ვერ დაძლია, თუმცა სადებიუტო ევროპირველობაზე გამარჯვების მოპოვება შეძლო, საქართველომ ბოსნია და ჰერცეგოვინას მოუგო და გულშემატკივარს კარგი შთაბეჭდილება დაუტოვა.
ტიტე კალანდაძის გაწვრთნილმა საქართველოს ნაკრებმა სადებიუტო ევროპირველობაზე 3 მატჩი ჩაატარა 1 მოიგო და 2 წააგო. ჩვენი გუნდი ნიდერლანდებთან 29:34 დამარცხდა, მეორე შეხვედრა კი ტურნირის მოქმედ ჩემპიონთან, შვედეთის ნაკრებთან 26:42 წააგო.
მეორე ევროპის ჩემპიონატამდე მიმავალ გზაზე საქართველოს ნაკრებმა მესამე საკვალიფიკაციო ჯგუფში სამი გამარჯვება მოიპოვა, ორი ბოსნია და ჰერცეგოვინასთან და ერთი საბერძნეთთან. ჩვენმა გუნდმა ჯგუფში მეორე ადგილი დაიკავა და ზედიზედ მეორე ევროპის ჩემპიონატისთვის მზადება გააგრძელა.
მალმეში გამგზავრებამდე, საქართველოს ნაკრებმა მოსამზადებელი დასკვნითი შეკრება სლოვენიაში გაიარა, სადაც ქუვეითთან და ალჟირთან 2 ამხანაგური მატჩი ჩაატარა. ქუვეითს 28-24 მოუგო, ალჟირთან დაძაბულ დაპირისპირებაში კი 30-32 წააგო.
"გუნდის მთავარი ძალა კვლავ გიორგი ცხოვრებაძეა, რომელიც ცნობილია თავისი ძლიერი ნახტომითა და გადამწყვეტ მომენტებში შეტევის გაძღოლის უნარით. მის გვერდით კვლავ იქნება გიორგი დიხამინჯია – საკვალიფიკაციო ეტაპის საკვანძო ფიგურა," - ასე გამოეხმაურა საქართველოს ნაკრებს ევროპის ხელბურთის ფედერაცია.
ევროპის ჩემპიონატს ტრავმის გამო გამოტოვებს შარშან მაისში, საქართველო-საბერძნეთის მატჩის დროს დაშავებული ნაკრების კაპიტანი თეიმურაზ ორჯონიკიძე, ქართველი ხელბურთელი ამ დრომდე რეაბილიტაციას გადის.
საქართველოს ნაკრების შემადგენლობა
ზურაბ ცინცაძე, დავით ნიქაბაძე, გიგი რუხაძე, ხაზეინ რუსტამოვი, ვახტანგ ხარებაშვილი, დავით გრიშიკაშვილი, გიორგი ლაპიაშვილი, მირიან გავაშელიშვილი, ვახტანგ ხელისუფალი, გიორგი არეშიძე, ირაკლი კბილაშვილი, ერეკლე არსენაშვილი, გიორგი დიხამინჯია, ზურაბ გოგავა, გიორგი ცხოვრებაძე, ნიკოლოზ კალანდაძე
მთავარი მწვრთნელი: ტიტე კალანდაძე
მწვრთნელები: მერაბ მეტრეველი, შოთა თევზაძე
საქართველოსა და ხორვატიის მატჩი, 17 იანვარს თბილისის დროით 21:00 საათზე დაწყება.
