კილიან მბაპემ პარიზულ კლუბს უკვე განუცხადა, რომ სეზონის ბოლოს კლუბს დატოვებს. ყველაფერი კი იმისკენ მიდის, რომ ფრანგი შემტევი ოცნებას აიხდენს და სამეფო კლუბში ითამაშებს. ესპანურ და ფრანგულ პრესას თუ დავუჯერებთ, მხარეები კონტრაქტის ბოლო დეტალებს მალე მოაგვარებენ და უახლოეს პერიოდში ტრანსფერიც ოფიციალურ სახეს მიიღებს.
რაც შეეხება ალფონსო დეივისს, კანადელი და ბაიერნი ახალ კონტრაქტზე ვერ თანხმდებიან. 23 წლის მარცენა მცველი წელიწადში 20 მილიონამდე ევროს ითხოვს, მიუნხენური კლუბი კი ფეხბურთელისთვის 12-13 მილიონ ევროზე მეტის შეთავაზებას არ აპირებს. რეალთან დაახლოებულ წყაროებს თუ დავუჯერებთ, სამეფო კლუბსა და ალფონსოს შორის წინასწარი სიტყვიერი შეთანხმება უკვე არსებობს და მალე ესპანური გუნდი პირველ შეთავაზებასაც გააკეთებს. ბაიერნში დეივისის შემცვლელს უკვე ეძებენ.
ახლა კი რეალის ძველ მეგობარ, აშკარ ჰაკიმიზე ვისაუბროთ. ფეხბურთელი სამეფო კლუბის აღზრდილია, 2015-2017 წლებში აშრაფმა რეალის 18 და 19 წლამდე გუნდებში ითამაშა, ბოლოს კი რეალ კასტილიაშიც მოასწრო ერთი სეზონის გატარება. შემდეგ იყო დროებითი განშორება, რასაც საბოლოო დამშვიდობებაც მოჰყვა. დორტმუნდში გატარებული 2-წლიანი იჯარის შემდეგ, ჰაკიმი ინტერში გადავიდა. იმ დროს, რეალის გულშემატკივრებს დიდი იმედი ჰქონდათ, რომ ფეხბურთელი კლუბში დაბრუნდებოდა, თუმცა კარვახალთან კონკურენციაში შესვლა არცერთი მხარის გეგმებში არ შედიოდა. "ნერაძურიში" გატარებული კარგი სეზონის შემდეგ, საქმეში პსჟ ჩაერთო, რომელმაც 2021 წლის ზაფხულის სატრანსფერო ფანჯარაზე, დიდი ამბები დაატრიალა - გუნდმა ერთდროულად ისეთი ფეხბურთელები შეიძინა, როგორებიცაა: ლიონელ მესი, სერხიო რამოსი, ჯანლუიჯი დონარუმა, ჟორჟინიო ვაინალდუმი და აშრაფ ჰაკიმი.
თუმცა თამამად შეგვიძლია იმის თქმა, რომ ამ სიიდან გაცემული ავანსები, მეტწილად, ვერავინ გაამართლა. გუნდში ახლა მხოლოდ დონარუმა და ჰაკიმი დარჩენენ, დანარჩენმა ფეხბურთელებმა პსჟ უკვე დატოვეს. ჰაკიმის და ჯიჯოს მომავალი კი საკმაოდ გაურკვეველია. ორივე მათგანს კლუბთან არსებული კონტრაქტი 2026 წელს ეწურება და ამ დრომდე, მხარეებს შორის ახალ ხელშეკრულებაზე საუბარი არ დაწყებულა. რა იქნება დონარუმას თავს ჯერ უცნობია, მაგრამ როგორც ირკვევა, ჰაკიმის დაბრუნებაზე რეალ მადრიდში სერიოზულად ფიქრობენ. 25 წლის ფეხბურთელის გეგმების შესახებ ჯერ არაფერი ვიცით, თუმცა დიდია ალბათობა, რომ თუ საქმე საქმეზე მიდგება, ფეხბურთელი სამეფო კლუბს უარს არ ეტყვის.
ამ ყველაფერს ისიც ემატება, რომ დანი კარვახალი ნელ-ნელა კარიერის დასასრულისკენ მიდის. ესპანელი ფლანგის მცველი უკვე 32 წლისაა და კლუბთან არსებული კონტრაქტი 2025 წელს უმთავრდება... და ზუსტად 2025 წელს გეგმავს "სამეფო კლუბი" ჰაკიმის დაბრუნებაზე მუშაობის დაწყებას. თუმცა განიხილება გეგმა ბ, ე.წ. მბაპეს-სტილის გარიგება: გუნდი 2026 წლამდე მოიცდის და შემდეგ ფეხბურთელს უფასოდ გაიფორმებს. რეალ მადრიდის ინტერესი ჰაკიმის მიმართ იმაზე სერიოზულია, ვიდრე ეს ახლა ჩანს.
