მატჩის დღე: კვარაცხელია ლუკმენის წინააღმდეგ, კონტე გასპერინის პირისპირ

წარმოგიდგენთ კვირის ყველაზე გამორჩეულ შეხვედრებს. დღევანდელი დღე საინტერესო მატჩებს გვიმზადებს: მანჩესტერ იუნაიტედი უპირისპირდება ლონდონის ჩელსის, ნაპოლი - ბერგამოს ატალანტას შეხვდება, ასევე, კიდევ არაერთი გამორჩეული თამაში გველოდება. 

მანჩესტერის მდგომარეობა ნამდვილად არასახარბიელოა - 11 ქულა და მე-13 ადგილი. ეს გუნდი ქულებით ბოლოადგილოსან ვულვერჰემპტონთან უფრო ახლოს არის, ვიდრე ლიდერ ლივერპულთან. "არისტოკრატებში" კი ყველაფერი, შეიძლება ითქვას, რომ გეგმის მიხედვით მიდის. დღევანდელი პერსპექტივით, "ლურჯები" სეზონის 4-ეულში დასრულების რეალური პრეტენდენტები არიან.

სტემფორდ ბრიჯის ბინადრები მეოთხეადგილოსან და თანაქალაქელ არსენალს სულ რაღაც ერთი ქულით ჩამორჩებიან, იუნაიტედთან გამარჯვების შემთხვევაში კი ისინი მეზობლებსაც გაასწრებენ. "წითელი ეშმაკებისა" და ენცო მარესკას გუნდის მატჩის გარდა, დღეს შედგება კიდევ ერთი დაპირისპირება: ტოტენჰემი-ასტონ ვილა.

18:00 - ტოტენჰემი-ასტონ ვილა
20:30 - მანჩესტერ იუნაიტედი-ჩელსი

ლა ლიგა

ლა ლიგის მე-12 ტურის ცენტრალური დაპირისპირება მადრიდის რეალსა და ვალენსიას შორის უნდა შემდგარიყო, თუმცა აღნიშნული თამაში ქალაქში მომხდარი წყალდიდობის გამო გადაიდო. ცნობისთვის, იმავე მიზეზის გამო ვერ ვიხილვათ გიორგი ქოჩორაშვილის ლევანტეს მატჩსაც. ამის მიუხედავად, საინტერესო თამაშების ნაკლებობა პრიმერაში მაინც არ იქნება.

პირველ რიგში, გამოსარჩევია დერბი - ბარსელონა-ესპანიოლი. მასპინძლები შესანიშნავ ფორმაში არიან და სატურნირო ცხრილს უახლოეს მოწინააღმდეგესთან, "სამეფო კლუბთან" 6-ქულიანი სხვაობით ლიდერობენ. ამის გარდა, ასევე გამოსარჩევია ატლეტიკოსა და ლას პალმასის მატჩიც.

17:00 - ატლეტიკო-ლას პალმასი
19:15 - ბარსელონა-ესპანიოლი
21:30 - სევილია-სოსიედადი
23:55 - ბილბაო-ბეტისი

სერია ა

ქართველი გულშემატკივრისთვის ყველაზე საინტერესო სერია ა-ში მოხდება - ნაპოლი ბერგამოს ატალანტას მიიღებს. ანტონიო კონტე ჯან პიერო გასპერინის წინააღმდეგ, ხვიჩა კვარაცხელია კი ადემოლა ლუკმენის პირისპირ. ამ მატჩს ინტრიგა ნამდვილად არ აკლია. ლიდერი ამ დროისთვის "პარტენოპეი" არის, რომელიც უახლოეს მდევრებს, მილანის ინტერსა და ტურინის იუვენტუსს, 4 ქულით უსწრებს.

შემდეგ მოდის სწორედ "ლა დეა", რომელთანაც სამხრეთელებს ექვსქულიანი სხვაობა აქვთ. ქართველ გარემარბს დღევანდელ მოწინააღმდეგესთან ბრწყინვალე სტატისტიკა აქვს: 2 მატჩი, 2 მოგება, 2 გატანილი ბურთი. აქვე დავამატებთ იმასაც, რომ სერია ა-ს გასულ ტურში "აძურის" ლიდერმა მილანის კარი აიღო.
ვნახოთ, რას იზამს 23 წლის გარემარბი "შავ-ლურჯების" წინააღმდეგ. 

დღეს თავის შეხვედრას ჩაატარებს "ნერაძურიც", რომლის მოწინააღმდეგე აუტსაიდერი ვენეცია იქნება. "გველების" კონკურენტები არიან როგორც მარადონას ბინადრები, ისე გასპერინის გუნდიც და აქედან გამომდინარე, მათთვის ფრე იქნება ყველაზე ოპტიმალური შედეგი, მაგრამ 1 ქულისთვის თამაშს არ აპირებს არც კონტეს გუნდი და არც გევის სთეიდიუმის ბინადრები.

15:30 - ნაპოლი-ატალანტა
18:00 - ტორინო-ფიორენტინა
21:00 - ვერონა-რომა
23:45 - ინტერი-ვენეცია

ლეგიონერები

კვარაცხელიას გარდა, დღეს კიდევ რამდენიმე ლეგიონერს ვიხილავთ. სერია ბ-ს გასულ ტურში გიორგი კვერნაძემ ფროზინონეს შემადგენლობაში 90 წუთი ითამაშა და ასისტი გაიფორმა. დღეს, "ჯალაძურის" მეტოქე კატანცარო იქნება. იქვე ახლოს, თავის მატჩს ჩაატარებს ლუკა ლოჩოშვილიც, რომლის კრემონეზე პიზას მიიღებს.

სხვა შეხვედრები ქართველი ლეგიონერების მონაწილეობით - ოთარ კაკაბაძის კრაკოვია ესტუმრება ლეხიას, სანდრო ალთუნაშვილის ვოლფსბერგერი -  კლაგენფურტს, ანზორ მექვაბიშვილის კრაიოვას კი ურთულესი გამოცდა ელის სტიაუასთან.

15:30 - ნაპოლი-ატალანტა
17:00 - ატლეტიკო-ლას პალმასი
17:30 - კლაგენფურტი-ვოლფსბერგერი
18:00 - ტოტენჰემი-ასტონ ვილა
18:00 - კრემონეზე-პიზა
18:00 - კატანცარო-ფროზინონე
19:15 - ბარსელონა-ესპანიოლი
20:30 - მანჩესტერ იუნაიტედი-ჩელსი
20:30 - ლეხია-კრაკოვია
21:00 - ვერონა-რომა
23:00 - კრაიოვა-სტიაუა
23:45 - ინტერი-ვენეცია