მატჩის დღე: სასკუდეტო დუელი სერია ა-ში და ბევრი სხვა

შაბათის მატჩის დღე გვიმზადებს არაერთ საინტერესო დაპირისპირებას. პირველ რიგში გამოსარჩევია საჩემპიონო დუელი სერია ა-ში - პირველ ადგილზე აღზევებული მოქმედი ჩემპიონი, მილანის ინტერი კრიზისში მყოფ ნაპოლის ესტუმრება. განვიხილოთ როგორც სასკუდეტო დუელი, ისე სხვა მატჩებიც.

ლა ლიგა

ლა ლიგაში დღეს ვიხილავთ ჩემპიონობისთვის მებრძოლ ორივე მადრიდულ გუნდს - რეალი სევილიაში ესტუმრება ბეტისს, ატლეტიკო კი ბილბაოს ატლეტიკს მიიღებს. შეგახსენებთ, რომ 1-2 პოზიციებს 54-54 ქულით იყოფენ "სამეფო კლუბი" და ბარსელონა, შემდეგ კი მოდის "როხიბლანკო", რომელსაც 1 ქულით ნაკლები აქვს.

17:00 - ჟირონა-სელტა

19:15 - რაიო ვალეკანო-სევილია

21:30 - ბეტისი-რეალი

23:55 - ატლეტიკო-ბილბაო

სერია ა

როგორც აღვნიშნეთ, სერია ა-ში ნამდვილი საჩემპიონო ბრძოლა გაიმართება. ნაპოლი იტალიის ჩემპიონატს ლიდერობდა პრაქტიკულად მთელი სეზონის მანძილზე, მაგრამ ბოლო 4-მატჩიანი მოუგებელი სერიის შემდეგ, პირველ პოზიციაზე ინტერი აღზევდა. 26 ტურის შემდეგ, "პარტენოპეი" მოქმედ ჩემპიონ მილანელებს 1 ქულით ჩამორჩება.

აღნიშნული შეხვედრა კიდევ რამდენიმე დეტალის გამოა განსაკუთრებული. "ლურჯების" ბანაკში დღეს არიან ანტონიო კონტე და რომელუ ლუკაკუ, რომლებიც რამდენიმე წლის წინ, სკუდეტოს "ნერაძურისთვის" იგებდნენ. იმ დროს გამორჩეული იყო ბელგიელი ფორვარდისა და ლაუტარო მარტინესის დუელი, მაგრამ დღეს, ისინი უკვე მეტოქეები არიან.

შეგახსენებთ იმასაც, რომ პირველ წრეში ამ გუნდების შეხვედრა დასრულდა ფრედ, 1:1. "გველები" გამარჯვებასთანაც იყვნენ ახლოს, თუმცა ხელისშემშლელ ფაქტორად გამოდგა ერთი უიშვიათესი მოვლენა: ჰაკან ჩალჰანოღლუმ 11-მეტრიანი გააფუჭა. სწორედ მან გაათანაბრა იმ მატჩში ანგარიში, მაგრამ საქმის ბოლომდე მიყვანა თურქმა გამთამაშებელმა ვერ შეძლო.

ჯუზეპე მეაცას ბინადრებისა და "აძურის" გარდა, არ უნდა დაგვავიწყდეს ჩემპიონობის კიდევ ერთი მაძიებელი, ბერგამოს ატალანტა, რომელიც ასევე დღეს საკუთარ კედლებში აუტსაიდერ ვენეციას მიიღებს. საკმაოდ მაღალია იმის ალბათობა, რომ სიმონე ინძაგის გუნდმა, მარადონას ბინადრებმა და "ლა დეამ" დღის ბოლოსთვის პოზიციები გაცვალონ.

18:00 - ატალანტა-ვენეცია

21:00 - ნაპოლი-ინტერი

23:45 - უდინეზე-პარმა

ბუნდესლიგა

ბუნდესლიგაში რთული გამოცდა ელის ბუდუ ზივზივაძის ჰაიდენჰაიმს, რომელიც საკუთარ კედლებში მიუნხენგლადბახის ბორუსიას მიიღებს. ერთ მხარეს არის გასავარდნ ზონაში მყოფი "როთბლაუსი", მეორე მხარეს კი ევროთასების საგზურის მაძიებელი "პრუსიელები". შეგახსენებთ იმასაც, რომ ქართველ ფორვარდს გერმანიის უმაღლეს დივიზიონში გოლი ჯერ არ გაუტანია.

18:30 - სანქტ პაული-დორტმუნდი

18:30 - ვერდერი-ვოლფსბურგი

18:30 - ჰაიდენჰაიმი-გლადბახი

18:30 - ლაიფციგი-მაინცი

18:30 - ბოხუმი-ჰოფენჰაიმი

21:30 - აინტრახტი-ლევერკუზენი

ლიგა 1

ძალიან საინტერესო შეხვედრა გველის ლიგა 1-ში - ხვიჩა კვარაცხელიას პარის სენ-ჟერმენი საკუთარ კედლებში ლილს მიიღებს. დედაქალაქური გუნდის ახალწვეულმა ქართველმა ვინგერმა უკვე მოასწრო 2 ბურთისა და 2 ასისტის გაფორმება. ვნახოთ, რა იქნება "წითლებთან". ამ მატჩამდე რამდენიმე საათით ადრე, ზურიკო დავითაშვილის სენტ-ეტიენი ნიცას მიიღებს.

20:00 - სენტ ეტიენი-ნიცა

22:00 - ლანსი-ლე ავრი

23:55 - პსჟ-ლილი

შაბათის მატჩის დღის ყველა გამორჩეული დაპირისპირება:

18:00 - ჩეზენა-სალერნიტანა

18:30 - ჰაიდენჰაიმი-გლადბახი

19:00 - სტოკი-უოტფორდი

20:00 - სენტ ეტიენი-ნიცა

21:00 - ნაპოლი-ინტერი

21:30 - ბეტისი-რეალი

21:45 - მანჩესტერ სიტი-პლიმუთი

23:15 - შარლოტი-ატლანტა