მატჩის დღე - სპალეტი ნაპოლის წინააღმდეგ, კონტე კი იუვენტუსის

კვირის მატჩის დღის ცენტრალური დაპირისპირება - ტურინის იუვენტუსის სტუმრობა გუნდთან, რომლის გულშემატკივრებისთვის ის ყველაზე პრინციპული და საძულველი მეტოქეა. დიახ, "ბიანკონერი" ნეაპოლში ჩადის.

ნაპოლი V იუვენტუსი

სერია ა-ში ჩატარებული 13 ტურის შემდეგ, ნაპოლი იუვენტუსზე უკეთეს მდგომარეობაში იმყოფება. იტალიის ჩემპიონატის მოქმედი ტრიუმფატორი 28 ქულით არის მე-3 პოზიციაზე და ტურინელებთან მოგების შემთხვევაში, "პარტენოპეი" პირველ ადგილზეც გადაინაცვლებს.

"ბიანკონერის" აქვს ხუთი ქულით ნაკლები და უახლოესი მიზანი ოთხეულში შესვლა არის. სერია ა-ს ყველაზე ტიტულოვანმა გუნდმა სეზონი დაიწყო მძიმედ, რაც იგორ ტუდორს სამსახურის დაკარგვად დაუჯდა. მის ნაცვლად მოვიდა ლუჩანო სპალეტი, სპეციალისტი, რომელიც "აძურის" ისტორიის ნაწილია.

როგორც გვახსოვს, დიეგო მარადონას ბინადრებისთვის საჩემპიონო 2022/2023 წლების სეზონში მათი მწვრთნელი სწორედ იტალიელი სპეციალისტი იყო. დღეს, ნეაპოლელთა ექს-დამრიგებელი უკვე ალიანცზე მოღვაწეობს. აღნიშნული შეხვედრა პრინციპული იქნება არა მხოლოდ 66 წლის ტაქტიკოსისთვის, არამედ ანტონიო კონტესთვისაც.

თუ სპალეტის ტკბილი მოგონებები აკავშირებს "პარტენოპეისთან", მისი თანამემამულე მოწინააღმდეგისთვის ასეთი გუნდი იუვენტუსია. იტალიელმა სპეციალისტმა საფეხბურთო კარიერის უდიდესი ნაწილი გაატარა ტურინში, მოგვიანებით კი დამრიგებლის რანგში მან თავის გუნდს 3 სკუდეტო მოაგებინა.

ერთი სიტყვით, დღევანდელი მატჩი ინტრიგის ნაკლებობას ნამდვილად არ განიცდის. ეს იქნება აღნიშნული გუნდების რიგით 185-ე დაპირისპირება. რაც შეეხება განვლილ შეხვედრებს: 85-ჯერ მოიგო "ბიანკონერიმ", 48-ჯერ "აძურიმ", 51 თამაში ფრედ დასრულდა. გასულ სეზონში სკუდეტოს მოგების მიუხედავად, უკვე ზედიზედ 3 თამაშია, რაც მარადონას ბინადრები იუვეს ვერ უგებენ.

კვირის მატჩის დღე