"მოგესალმებით ყველას, მე კილიანი ვარ და როგორც შეგპირდით, სიახლეს პირადად ჩემგან გაიგებდით - პარი სენ ჟერმენში ბოლო სეზონს ვატარებ, კონტრაქტს არ ვახანგრძლივებ და ჩემი პარიზული კარიერა რამდენიმე კვირაში დასრულდება."
"პარკ დე პრენსზე ბოლო მატჩს კვირას ჩავატარებ და ეს ჩემთვის ემოციურია. მრავალი წლის მანძილზე მქონდა პატივი საუკეთესო ფრანგული და მსოფლიოს ერთ-ერთი წამყვანი კლუბის წევრი ვყოფილიყავი. აქ მქონდა შესაძლებლობა დიდი ჩემპიონების გვერდით მეთამაშა და გამოცდილება მიმეღო."
"პირველ რიგში, მადლობა მინდა გადავუხადო ყველა თანაგუნდელს, მთავარ მწვრთნელებს: უნაი ემერის, ტომას ტუხელს, მაურისიო პოჩეტინოს, კრისტოფ გალტიესა და ლუის ენრიკეს. ასევე სპორტულ დირექტორებს: ლეონარდოს და ლუის კამპოსს, რომლებიც ყოველთვის გვერდში მედგნენ. მადლიერი ვარ კლუბის ყველა თანამშრომლის, რომლებიც ჩრდილში არიან და ვერ ხედავთ - ისინი ყველაფერს აკეთებენ კლუბისთვის და დაფასებას იმსახურებენ."
"ვერასდროს ვიფიქრებდი, რომ ასეთი რთული იქნებოდა თქვენთვის იმის თქმა, რომ კლუბს ვტოვებ, მაგრამ ვფიქრობ, რომ 7 წლის შემდეგ ახალი გამოწვევები მჭირდება. განსაკუთრებული მადლობა მინდა გადავუხადო გულშემატკივრებს - ყოველთვის ვგრძნობდი თქვენს თანადგომას და მოედანზე მაქსიმუმს ვაკეთებდი. პსჟ არის კლუბი, რომელიც არავის ტოვებს გულგრილს - ის ან გიყვარს, ან გეზიზღება, მე სიყვარული ავირჩიე და არ ვნანობ აქ გატარებულ 7 წელს. ეს არის კლუბი, რომელიც მთელი ცხოვრების მანძილზე მემახსოვრება."
"პარი სენ ჟერმენის ფეხბურთელი აღარ ვიქნები, თუმცა, აუცილებლად ვუყურებ გუნდის ყველა მატჩს. 7 წლის მანძილზე ყოველთვის ვცდილობდი, რომ მოედანზე ჩემი თავის საუკეთესო ვერსია ვყოფილიყავი და მინდა კიდევ ერთხელ გადაგიხადოთ მადლობა, რადგან თქვენ გარეშე იმ ემოციების ნახევარსაც ვერ ვიგრძნობდი, რაც აქ განვიცადე - ამისთვის მთელი ცხოვრება მადლიერი ვიქნები. იმედი მაქვს, რომ სეზონს კიდევ ერთი ტიტულით დავასრულებთ."
კილიან მბაპეს პარიზული კარიერა 2017 წელს დაიწყო - მან პსჟ-ს მაისურით 306 მატჩში მიიღო მონაწილეობა, 255 გოლი გაიტანა და 108 ასისტი გაიფორმა, ხოლო გუნდთან ერთად 14 ტიტული მოიგო. 25 წლის ფრანგი შემტევი ზაფხულში რეალს თავისუფალი აგენტის სტატუსით შეუერთდება.
