პრემიერ ლიგის მე-11 ტურის ცენტრალურ მატჩში მანჩესტერ სიტი საკუთარ კედლებში ლივერპულს მიიღებს. ეს იქნება პეპ გუარდიოლას რიგით მე-1000 შეხვედრა დამრიგებლის რანგში. 2007 წლის ივნისიდან-დღემდე, ესპანელ სპეციალისტს უმუშავია ბარსა ბ-ში, ბარსას მთავარ გუნდში, მიუნხენის ბაიერნსა და "ქალაქელებში".
აქამდე ჩატარებულ 999 მატჩში ეტიჰადის ბინადრების ამჟამინდელი მწვრთნელის სტატისტიკა ასეთია - 715 გამარჯვება, 156 ფრე და 128 მარცხი. ხოსეპის მოგებული შეხვედრების საშუალო პროცენტული მაჩვენებელი 71.57-ს უდრის. რაც შეეხებათ მეტოქეებს, ყველაზე ხშირად ის თამაშობს ლონდონის არსენალთან და ყველაზე ხშირად სწორედ ამ კლუბს უგებს.
უფრო კონკრეტულად, 54 წლის მწვრთნელმა "მეთოფეების" წინააღმდეგ ითამაშა 33-ჯერ, 20 შემთხვევაში კი გამარჯვება მოიპოვა. ყველაზე მეტი წაგება, 10-10, გუარდიოლას აქვს მერსისაიდელებთან და ლონდონის სხვა ბინადართან, ტოტენჰემთან. რაც შეეხება პერსონალურ დუელებს უშუალოდ დამრიგებლებთან, აქ ყურადღების ცენტრში იურგენ კლოპია.
ესპანელმა მწვრთნელმა ყველაზე მეტი, 30 მატჩი ჩაატარა სწორედ გერმანელი ოპონენტის წინააღმდეგ და ყველაზე მეტი მარცხი (12) სწორედ მასთან განიცადა. პეპის ყველაზე სასურველი მეტოქე კი შონ დაიჩია, რომელსაც 18 შეხვედრიდან 16 მოუგო. იყო დრო, როცა ამ სიაში ჟოზე მოურინიო ლიდერობდა.
მივადექით ფეხბურთელებს, მან სიტის ამჟამინდელი მწვრთნელის ყველაზე ხშირად გამოყენებადი მოთამაშე არის ბერნარდო სილვა, 421 შეხვედრით. ხოსეპის კარიერის მთავარი გოლეადორი 211 ბურთით ლეო მესია და რაც შეეხება ერლინგ ჰოლანდს, ახალგაზრდა ფორვარდს კიდევ სჭირდება 70 გოლის შეგდება ლეგენდარული ფლეიმეიქერის დასაჩრდილად.
საგოლე გადაცემების მაჩვენებლით უკონკურენტოა კევინ დე ბრუინი (164), რომელიც უახლოეს მდევარს, ისევ და ისევ არგენტინელ ფლეიმეიქერს 70 ასისტით უსწრებს. ბოლოს კი 54 წლის სპეციალისტის ყველაზე ძვირადღირებულ შენაძენზეც ვთქვათ: ჯეკ გრილიში, ბირმინგემის ასტონ ვილადან-მანჩესტერულ კლუბში, 117.5 მილიონ ევროდ.
