2024 წლის ძიუდოს მსოფლიო ჩემპიონატის მესამე საჭიდაო დღეს საქართველოს ნაკრების ერთი ოქროს და ერთი ბრინჯაოს მედლის მოპოვების შანსი აქვს - 81 კგ. წონით კატეგორიაში ტატო გრიგალაშვილი პირველობისთვის, ხოლო დიმიტრი გოჩილაიძე მესამე ადგილისთვის იბრძოლებს.
მსოფლიოს მოქმედმა ჩემპიონმა, ტატო გრიგალაშვილმა, პირველი წრეში დაისვენა და მეორე წრეში გერმანელი კაველიუსი დაამარცხა, ხოლო შემდეგ თურქეთის სახელით მოჭიდავე ალბაირაქს მოუგო და 1/4 ფინალში გავიდა. ქართველმა ძიუდოისტმა 1/4 ფინალში ტაჯიკი მახმადბეკოვი დაამარცხა, 1/2 ფინალში კი სამხრეთ კორეელ ლის აჯობა და ფინალის საგზური მოიპოვა. აღსანიშნავია, რომ ტატო გრიგალაშვილი ზედიზედ მესამედ ეცდება მსოფლიო ჩემპიონის ტიტულის მოპოვებას - ოქროსთვის ბრძოლაში ქართველის მეტოქე რუსი არბუზოვი იქნება.
დიმიტრი გოჩილაიძემ ასპარეზობა პირველი წრიდან მოლდოველი ლაციევის დამარცხებით დაიწყო, ხოლო შემდეგ ეტაპზე რუმინელ სულჩას მოუგო და 1/8 ფინალში გავიდა, სადაც იტალიელი ესპოსიტო დაამარცხა. 1/4 ფინალში ქართველმა ავსტრიელი ფაშინგის ბარიერი დაძლია, თუმცა, 1/2 ფინალში რუს არბუზოვთან დამარცხდა და მესამე ადგილისთვის ბრძოლაზე გადაერთო. ბრინჯაოს მედლისთვის გოჩილაიძე ტაჯიკ მახმადბეკოვს შეხვდება.
ფინალური ორთაბრძოლები დღეს, თბილისის დროით 18:00 საათზე დაიწყება.
ოქროს და ბრინჯაოს შანსი - გრიგალაშვილი პირველობისთვის, ხოლო გოჩილაიძე მესამე ადგილისთვის იბრძოლებს
