მიმდინარე სეზონისა და სანაკრებო მატჩების შესახებ, საქართველოს ნაკრებისა და გრაცის „შტურმის“ ფეხბურთელმა, ოთარ კიტეიშვილმა La Gazzetta dello Sport Georgia-სთან ინტერვიუში ისაუბრა:
- გასულ სეზონში პირველი ტიტული მოიპოვე „შტურმთან" ერთად, ავსტრიის თასის გამარჯვებულები გახდით, ახლა ჩემპიონობისთვის იბრძვით, 12-წლიანი პაუზის შემდეგ, წელს შანსი გაქვთ ჩემპიონები გახდეთ, რა ვითარებაა ამ დროისთვის შენს გუნდში, ვხედავთ, კარგ ფორმაში ხართ...
- გუნდში ძალიან კარგი განწყობაა, კარგად დავიწყეთ სეზონი, ჩემპიონატშიც კარგად ვთამაშობთ, მეორე ადგილზე ვართ, „ზალცბურგს“ მივყვებით და ამოსუნთქვის შესაძლებლობას არ ვაძლევთ, ჩვენ შორის 2 ქულაა სხვაობა, ვცდილობთ ეს სხვაობა შევინარჩუნოთ და შემდეგ უკვე ფლეი-ოფებში ვაჯობოთ, სადაც ზედა ექვსეულის გუნდები თამაშობენ. სწორედ იქ გამოჩნდება ჩვენი ნამდვილი ძალა, სად ვართ და რა შეგვიძლია. „ზალცბურგთან“ ბრძოლის ძალა შეგვწევს, 2 თამაში ვითამაშეთ არ წავაგეთ, შარშან თასის მეოთხედფინალში გამოვთიშეთ გათამაშებას, წელს ნახევარფინალში ვხვდებით გასვლაზე. გვინდა ტიტული თასზეც დავიცვათ და ავსტრიის ჩემპიონებიც გავხდეთ, იმედია, „ზალცბურგის“ თორმეტწლიან ჰეგემონიას დავამხობთ.
- კონფერენს ლიგაზე წარმატებით ასპარეზობთ, ფიქრობ, რომ “შტურმთან” ერთად გამორჩეულ სეზონს ატარებ?
- გუნდის შედეგებიდან გამომდინარე შეიძლება ასეც ითქვას. წინა ორი სეზონი სტაბილური არ იყო, როგორც კი ფორმაში შევიდოდი, ტრავმებს ვიღებდი. ვფიქრობ, ამ ეტაპზე კარგ დონეზე ვარ მომზადებული, განსაკუთრებით ფიზიკურ კონდიციაზე მაქვს საუბარი, შეკრებაც გუნდთან ერთად სრული დატვირთვით გავიარე. აქამდე შეკრების პერიოდში ხშირად სრული დატვირთვით ვერ ვვარჯიშობდი, ესეც განაპირობებდა ჩემი მომზადების ხარისხს.
კონფერენს ლიგაზე შემდეგ ეტაპზე გავედით, ახლა რთული მეტოქე გვყავს (ფრანგული, „ლილი“), ვეცდებით, ჩვენი შესაძლებლობები მაქსიმალურად გამოვავლინოთ.
- ევროპის ჩემპიონატის საკვალიფიკაციო ეტაპის ფლეი-ოფის ნახევარფინალში, 21 მარტს, საქართველოს ნაკრები ლუქსემბურგს დაუპირისპირდება, რამდენად რთული მეტოქეა?
- რა თქმა უნდა, ძალიან ველოდებით ამ თამაშს, დიდი ემოციითა და მონდომებით ვემზადებით ყველანი. მარტივი მეტოქე არ იქნება, სახლში ვთამაშობთ და ამ მხრივ უპირატესობა გვაქვს, მაგრამ ვფიქრობ, ძალიან მძიმე თამაში იქნება. ჩვენ უნდა გამოვავლინოთ შესაძლებლობების მაქსიმუმი, სწორად მოვემზადოთ ფსიქოლოგიურად, შესაბამისი განწყობა შევქმნათ, ზედმეტი ეიფორიის გარეშე. მნიშვნელოვანია როგორ ფორმაში იქნებიან ფეხბურთელები, დარწმუნებული ვარ ჩემსავით, ყველა ფეხბურთელი ძალიან ელოდება ამ დაპირისპირებას და განსაკუთრებულად ემზადება თამაშისთვის. იმედია, ლუქსემბურგის თამაშის შემდეგ კიდევ ერთი მატჩი გვექნება.
- ფინალში ვის ისურვებდი ყაზახეთი თუ საბერძნეთი, რომელი უფრო სასურველი მეტოქეა?
- ამ ფაქტორს დიდი მნიშვნელობა, ალბათ, მაინც არ ექნება, ყველაფერი ჩვენზეა დამოკიდებული, როგორ მოვახერხებთ ლუქსემბურგთან თამაშს. ამ ეტაპზე სრული კონცენტრაცია ნახევარფინალზე უნდა მოვახდინოთ, იმისთვის რომ ფინალში ვითამაშოთ, ჯერ ლუქსემბურგთან მოგებაა საჭირო. ჩემს რამდენიმე თანაგუნდელს მოუწია ლუქსემბურგთან თამაში და მითხრეს, რომ არ გვექნება მარტივი მატჩი, მეც ასეთი მოლოდინი მაქვს, რთულად დასაძლევი მეტოქე გვყავს, მაგრამ, რა თქმა უნდა, ჩვენი თამაშის ხარისხით ლუქსემბურგის დამარცხების უნარი გვაქვს.
- რას ფიქრობ, ხვიჩა კვარაცხელია რამდენად დააკლდება ამ თამაშს?
- კვარას დანაკლისი ყველასთვის რთულია, განსხვავება, რომელსაც ის მოედანზე ქმნის, იშვიათობაა. ასეთი დონის ფეხბურთელები მსოფლიოში ბევრი არაა და რა თქმა უნდა, ჩვენ გვაქვს ბედნიერება, ხვიჩა საქართველოს ნაკრებში თამაშობდეს. ლუქსემბურგთან ხვიჩას გარეშე რთული იქნება, მაგრამ გუნდი ვართ და ერთიანობით უნდა მოვახერხოთ დანაკლისის შევსება.
- ხვიჩა კვარაცხელიას შესახებ ავსტრიაში რას ამბობენ?
- ავსტრიაში ხშირად მეკითხებიან ხვიჩას შესახებ და მის გოლებსაც მიგზავნიან: ნახე რა გოლი შეაგდოო, თითქოს, ნანახი არ მქონდეს. ყველას ძალიან მოსწონს კვარას თამაში, მისი თამაშის სტილისა და ხარისხიდან გამომდინარე. ყველასთვის ძალიან სასიამოვნო საყურებელია, ძალიან აფასებენ და დიდ ყურადღებას იჩენენ, ჩემი რამდენიმე გუნდელის საყვარელი ფეხბურთელიც კი არის კვარა.
- საქართველოს ნაკრებს ევროპის ჩემპიონატზე გასვლის რა შანსი აქვს?
- ვფიქრობ, საქართველოს ნაკრებს შეუძლია დიდ ტურნირზე ითამაშოს. შეგვიძლია ევროპირველობაზე ვიასპარეზოთ, გვაქვს ამის შესაძლებლობა, უნარი და ხარისხი, საჭიროა ყველაფრის ერთად თავმოყრა გადამწყვეტ თამაშზე, რათა მაქსიმალურად საუკეთესო თამაში გამოვავლინოთ ლუქსემბურგის ნაკრების წინააღმდეგ. საქართველოს ამჟამინდელ ნაკრებს შესწევს უნარი ევროპის ჩემპიონატზე ითამაშოს, მაგრამ ეს დასამტკიცებელია და იმედია, ყველაფერი გამოგვივა.
- 3 კვირაზე ნაკრები რჩება ლუქსემბურგთან მატჩამდე, რას ფიქრობ ამ დროისთვის რამდენად მზად არიან ქართველი ფეხბურთელები მოახლოებული მატჩისთვის?
- რა თქმა უნდა, ყოველთვის ძალიან მიხარია ნებისმიერი ქართველი ფეხბურთელის წარმატება და მათი გამორჩეული თამაში. ძალიან მნიშვნელოვანია მოახლოებულ თამაშს, შეძლებისდაგვარად, ყველა მაქსიმალურად კარგ ფორმაში შეხვდეს. დიდი ხანია ამ თამაშს ველოდებით და დარწმუნებული ვარ, თითოეული ჩვენგანი თავდაუზოგავად ემზადება, ცდილობს, მაქსიმალურად იყოს კონცენტრირებული ამ თამაშისთვის.
- იანვარში ფრანგულ პრესაში ვრცელდებოდა ინფორმაცია, რომ შესაძლოა „მეცში“ გადასულიყავი, „მეციდან“ დაგიკავშირდნენ?
- საფრანგეთიდან ჩემთან არ ყოფილა კომუნიკაცია, როგორც ვიცი, რაღაც ინტერესი იყო გარკვეულ პერიოდამდე.
- “შტურმს” ვინმე დაუკავშირდა “მეციდან”?
- ამის შესახებ არ მაქვს ინფორმაცია, არ ვიცი „მეცსა“ და „შტურმს“ შორის მოლაპარაკება თუ შედგა.
- “მეცში” საქართველოს ნაკრების ფეხბურთელი გიორგი მიქაუტაძე თამაშობს, რას იტყვით გიორგიზე და რას ნიშნავს ის საქართველოს ნაკრებისთვის?
- გიორგი მიქაუტაძე მაღალი კლასის ფეხბურთელია და შეუძლია საქართველოს ნაკრებს ძალიან მაგრად დაეხმაროს თავსი გოლებით. მოწინააღმდეგისთვის სახიფათო ფეხბურთელია, არაფრისგან გოლის შექმნა შეუძლია, მნიშვნელოვანია როცა ასეთი თვისებების მოთამაშე გყავს.
გიორგი უფრო წყნარი და მშვიდია, მოედანს მიღმა ზედმეტ ემოციას არ გამოხატავს, უფრო მოედანზე კომუნიკაციას ცდილობს, ძალიან დიდი ძალაა საქართველოს ნაკრებისთვის.
- სეზონის ბოლოს “შტურმთან” კონტრაქტი გეწურება, ინტერესი რომელი გუნდებიდან არის ან თუ გეგმავ ხელშეკრულების გახანგრძლივებას?
- გახანგრძლივებაზე მიმდინარეობს საუბარი, მაგრამ ჯერ რთულია გადაწყვეტილების მიღება, უახლოეს მომავალში გამოჩნდება როგორ განვითარდება მოვლენები.
- რა შემთხვევაში დატოვებ „შტურმს“, რა დონის გუნდიდან უნდა იყოს შემოთავაზება?
- რა თქმა უნდა, ჩემი სურვილია TOP 5-დან ერთ-ერთ ჩემპიონატში ვითამაშო, ვიცი რთულია, თუმცა იმედია, მომეცემა ამის საშუალება. ჯერ “შტურმთან” მიმდინარეობს მოლაპარაკება და ბევრი რამ სეზონის ბოლოს გამოჩნდება, მერე მივიღებ გადაწყვეტილებას.
- ყოველთვის დიდ თანადგომას გიცხადებს “შტურმი”, ყველაზე დიდი მხარდაჭერა როდის იგრძენით ამ კლუბისგან?
- ყოველთვის ვგრძნობდი „შტურმისგან“ მხარდაჭერას, რაც არ უნდა ყოფილიყო, თუნდაც ტრავმების დროს, მქონდა ისეთი პერიოდი, როცა ფორმაში არ ვყოფილვარ, მაგრამ ცდილობდნენ გვერდზე დამდგომოდნენ, საჭირო წუთებს ყოველთვის ვიღებდი, ასევე, გულშემატკივრის მხრიდანაც ყოველთვის დადებითი ემოცია მოდიოდა, ძალიან კარგი დამოკიდებულება აქვთ ჩემ მიმართ, ძალიან კარგი გარემოა, თავს კარგად ვგრძნობ, ხელმძღვანელობა, გულშემატკივრები, ფეხბურთელები, ყველასთან კარგი დამოკიდებულება მაქვს და ოჯახივით ვართ.
- რას ეტყვი ახალგაზრდა ფეხბურთელებს და ბავშვებს, რომლებიც დიდ ფეხბურთზე ოცნებობენ ....
- სხვანაირი თაობა მოდის, განვითარებული, რაც ძალიან სასიხარულოა. ფეხბურთში ყველაზე მნიშვნელოვანი შრომაა და ალბათ, სწორი ხასიათის ჩამოყალიბება, შენიშვნისა და რჩევის სწორად მიღება და გარკვეული მზადება ყველაფრისთვის. ფეხბურთი მარტო თამაში არაა, დიდ პლატფორმას მოიცავს, უნდა ხვდებოდე რას როგორ მიუდგე და როგორ წარმართო შენი კარიერა. ბევრი გადაწყვეტილების მიღება გიწევს, ბევრ რამეზე შეიძლება გული დაგწყდეს, ისე არ მოხდეს, როგორც გინდა…, ბევრი ფაქტორია და ამ ყველაფრისთვის აუცილებლად გჭირდება ძალიან ძლიერი ხასიათი, მზადყოფნა მენტალურად და ფსიქოლოგიურად, რაც ჩემი აზრით, შრომასთან ერთად, ფეხბურთელისთვის ყველაზე მნიშვნელოვანია.
- გულშემატკივარი, სანაკრებო და საკლუბო განსხვავდება, თუმცა ავსტრიელი და ქართველი გუნშემატკივარი რომ შეადარო, რა მსგავსება-განსხავებებია?
- გულშემატკივარი არის მთავარი მამოძრავებელი, მათი ზემოქმედება დიდია, “შტურმში” დიდ ყურადღებას აქცევენ ქომაგობას. გამორჩეული, ჩემთვის საუკეთესო ფან-კლუბი გვყავს ავსტრიაში, როგორც საშინაო არენაზე, ასევე გასვლით მატჩებზეც. ყოველთვის საოცარ გარემოს ქმნიან, რაც დასაფასებელია.
ბოლო პერიოდში კიდევ უფრო აქტიურად გამოიკვეთა საქართველოს ნაკრების გულშემატკივარი, „ქომაგთა“ სახით. როცა საქართველოში ვთამაშობთ ტრიბუნები სავსეა, „ქართული სპორტის ქომაგების“ მხარდაჭერას ვგრძნობთ გასვლით თამაშებზეც, ისინი სხვადსხვა ქვეყანაში მოგვყვებიან. როცა ნაკრების ფორმას იცვამ, მარტო შენ თავს არ ეკუთვნი, შენი ქვეყნისთვის თამაშობ და გულშემატკივარი ყოველთვის უდიდეს მოტივაციას გაძლევს. საოცარი შეგრძნებაა, უცხო ქვეყანაში, გასვლით თამაშზე, ტრიბუნაზე რომ ხედავ, როგორ ფრიალებს საქართველოს დროშა და მშობლიურ ენაზე შეძახილები გესმის, ეს განსხვავებული გრძნობაა, ძლიან მიხარია რომ ქართველ გულშემატკივარს ძალიან უყვარს ფეხბურთი და სანაკრებო თამაშებს განსაკუთრებით ელოდებიან. სწორედ ეს ქმნის ფეხბურთს, ეს მუხტი გვჭირდება ქართულ ფეხბურთში.
- „შტურმის“ მატჩებზე მოსულ ქართველ გულშემატკივარზე რას იტყვი?
- საქართველოს დროშით ქართველი გულშემატკივრები “შტურმის” თამაშებზე ხშირად მოდიან. საკმაოდ ბევრი ქართველი ცხოვრობს გრაცში და საერთოდ ავსტრიაში, ისინი ხშირად მოდიან და მგულშემატკივრობენ. ესეც სხვანაირი სიხარულია, ჩვენ ქართველობას სხვანაირად ვუყურებთ, სხვა გრძნობაა, შენი თანამემამულე ქართულად რომ დაგიძახებს. როცა ეს მშობლიური, ქართული შეძახილი გესმის უცხო ქვეყანაში, რაღაცნაირად სხვანაირად ინთები, სიამაყე გეუფლება, გიხარია, ძალიან სასიამოვნოა ეს ყველაფერი, მადლობა ყველას.
- რა ეტყვი გულშემატკივარს ლუქსემბურგთან მატჩამდე?
- გულშემატკივარს ვეტყვი, რომ იმ დღეს, რომელსაც ყველანი ასე ძალიან ველოდებით, ჩვენ, პირადად მე და ყველა ფეხბურთელი, ყველაფერს გავაკეთებთ, იმაზე მეტსაც კი ვიდრე შეგვიძლია, რომ ღირსეული თამაში ვაჩვენოთ. ამ განწყობით უნდა ვიყოთ ყველა ფეხბურთელი, რომ იმ დღეს გავაკეთოთ ყველაზე მეტი, ის რაც სხვა დროს არ შეგვეძლება.
იმედია გულშემატკივარს იმ დიდ სიხარულს მივანიჭებთ, რომელსაც ამდენი ხანია ველოდებით და გვინდა რომ მოხდეს ჩენი ქვეყნისთვის.
ფოტო: საქართველოს ფეხბურთის ფედერაცია
