[პრევიუ] იუვენტუსი წარუმატებელი სერიის შეწყვეტას ლაციოსთან ეცდება

"ბებერი ქალბატონი" კრიზისშია - უკანასკნელი რვა შეხვედრის მანძილზე, გამარჯვება მხოლოდ ერთ მათგანში მოიპოვეს. საუბარია 25 თებერვალს გამართულ მატჩზე, როდესაც ფროსინონე დაამარცხეს. "ბიანკონერიმ" ჯერ პირველი ადგილი დაკარგა, რომელიც გადაულოცა ინტერს, ბოლოს კი მეორეც, სადაც ახლა მილანია.

"ბიანკოჩელესტე" მეცხრე ადგილზეა და ნაკლებად სავარაუდოა, რომ ამ გუნდმა ევროთასების საგზურის მოპოვება შეძლოს. აღსანიშნია ის ფაქტი, რომ "არწივების" ბუდეში სამწვრთნელო გადანაცვლებაც მოხდა: მაურიციო სარი იგორ ტუდორმა ჩაანაცვლა. აქვე დავამატებთ, "ნერაძურისა" და ნაპოლის მსგავსად, ოლიმპიკოს ბინადრები ჩემპიონთა ლიგას 1/8 ფინალიდან გამოითიშნენ.

ამ გუნდების ურთიერთშეხვედრების ისტორია 191 თამაშს მოიცავს. 100-ჯერ იმარჯვეს "შავ-თეთრებმა", 47-ჯერ ლაციომ, 44 შემთხვევაში კი ფრე დაფიქსირდა. იუვეს მხრიდან, რომაელების კარში ყველაზე მეტი, 14 ბურთი, გატანილი აქვს ალექს დელ პიეროს, საპირისპირო მიმართულებით კი სილვიო პიოლას (10 გოლი).

იგორ ტუდორი (ლაციოს მწვრთნელი): "იუვენტუსს ძალიან კარგად ვიცნობ და ამ გუნდთან ბევრი მოგონება მაკავშირებს. არ აქვს მნიშვნელობა, თუ როგორ ფორმაში არიან ტურინელები, მათზე სიტყვა "სუსტი" არასდროს ითქმის. ეს არის ერთ-ერთი ყველაზე სახიფათო მეტოქე და ცხადია, მეტი ყურადღება გვმართებს".

მასიმილიანო ალეგრი (იუვენტუსის მწვრთნელი): "დიახ, ახლა რთული პერიოდი გვაქვს, თუმცა იუვენტუსის მიდგომა არ იცვლება - გავალთ გამარჯვების მოსაპოვებლად და ამისთვის, მაქსიმუმს გავიღებთ. არ ღირს ახლა იმის შესახებ საუბარი, თუ რა იქნება ზაფხულში, ჯერ მიმდინარე სეზონი არის ჩასამთავრებელი".

ლაციოს ბოლო 5 მატჩი: ფროსინონე-ლაციო 2:3, ლაციო-უდინეზე 1:2, ბაიერნი-ლაციო 3:0, ლაციო-მილანი 0:1, ფიორენტინა-ლაციო 2:1;

იუვენტუსის ბოლო 5 მატჩი: ვერონა-იუვენტუსი 2:2, იუვენტუსი-ფროსინონე 3:2, ნაპოლი-იუვენტუსი 2:1, იუვენტუსი-ატალანტა 2:2, იუვენტუსი-ჯენოა 0:0;

ლაციო: მანდასი, რომანიოლი, კასალე, ფუენტესი, კატალდი, გენდუზი, ლაცარი, ძაკანი, ალბერტო, ანდერსონი, იმობილე.

დანაკლისი: პროვედელი, პელეგრინი, როველა.

იუვენტუსი: შესნი, დანილო, ბრემერი, გატი, კამბიაზო, მირეტი, მაკენი, ლოკატელი, კოსტიჩი, კიეზა, კინი.

დანაკლისი: პოგბა, მილიკი, ვლაჰოვიჩი, ფაჯოლი, ალკარასი.

იტალიის სერია ა, 30-ე ტური

30 მარტი, 21:00

ოლიმპიკო, რომი

მთავარი მსაჯი: ანდრეა კოლომბო