[პრევიუ] მატჩი ბევრი ინტრიგით და დიდი ინტერესით - დღეს ელ კლასიკოა!

ამ შეხვედრას წინ ბევრი ინტრიგა ახლავს. ასპარეზზე ახალი ფეხბურთელები გამოჩნდნენ, რომელთაც თავის წარმოჩენა და დამკვიდრება სურთ, მითუმეტეს ელ კლასიკოში. საინტერესო იქნება მწვრთნელთა დუელი - ფლიკი ანჩელოტის წინააღმდეგ.

რეალიც და ბარსელონაც ბრწყინვალე ფორმაშია და ამაში ჩემპიონთა ლიგამაც დაგვარწმუნა, როცა ესპანურმა გრანდებმა გერმანელები არ დაინდეს. რეალმა დორტმუნდი 5:2, ბარსელონამ კი ბაიერნი 4:1 დაამარცხა.

რაც შეეხება ლა ლიგას, 10 ტურის შემდეგ სატურნირო ცხრილის ერთპიროვნული ლიდერი, 27 ქულით ბარსელონაა, მეორე პოზიციას, 24 ქულით რეალი იკავებს. შესაბამისად, დღეს ანჩელოტის მთავარი მისია გამარჯვება და ლიდერობის დაბრუნებაა.

ელ კლასიკოს წინ რეალს ორი ძირითადის ფეხბურთელი - როდრიგო და კურტუა გამოაკლდა, რომელთაც ტრავმები აქვთ. დიდი ხანია ლაზარეთში არიან კარვახალი და ალაბა.

ბარსელონას ახალი ტრავმირებული არ ჰყავს. კატალონიელთა მხრიდან ტერ-შტეგენი, არაუხო, ტორესი და კრისტენსენი ვერ ითამაშებენ.

კარლო ანჩელოტი (რეალის მწვრთნელი): "მატჩისთვის აქტიურად ვემზადებით. ვიცით, თუ რა მნიშვნელობისაა ელ კლასიკო და ისიც ვიცით, რომ საკუთარ მოედანზე ვთამაშობთ და გულშემატკივრებს ჩვენი იმედი აქვთ. ბარსელონა კარგი გუნდია, ბრწყინვალე ფორმაში არიან და მოედანზე მაქსიმუმი უნდა ჩავდოთ. სელტასთან 3 მცველით ვითამაშეთ, მომდევნო მატჩში კი ტაქტიკური ცვლილებები იქნება, სხვა ტაქტიკას ვამზადებთ, სიახლეებს იხილავთ და ერთად ვნახავთ, გაამართლებს თუ არა ეს."

ჰანსი ფლიკი (ბარსელონას მწვრთნელი): "ჩვენი თავების გვჯერა და დარწმუნებულები ვართ, რომ ბოლომდე ვიბრძოლებთ და მაქსიმუმს ჩავდებთ. რეალი კარგი გუნდია, ვარსკვლავები ჰყავთ და ურთულესი თამაში იქნება. თუ მინდორზე ჩემმა ყველა ფეხბურთელმა თავისი საუკეთესო თამაში არ აჩვენა, ისე ბერნაბეუზე გამარჯვება ადვილი არ იქნება".

რეალის ბოლო 5 მატჩი: რეალი-დორტმუნდი 5:2, სელტა-რეალი 1:2, რეალი-ვილიარეალი 2:0, ლილი-რეალი 1:0, ატლეტიკო-რეალი 1:1;

ბარსელონას ბოლო 5 მატჩი: ბარსელონა-ბაიერნი 4:1, ბარსელონა-სევილია 5:1, ალავესი-ბარსელონა 0:3, ბარსელონა-იანგ ბოიზი 5:0, ოსასუნა-ბარსელონა 4:2;

ესპანეთის ლა ლიგა, მე-10 ტური;

26 ოქტომბერი, 23:00 საათი;

მადრიდი, სანტიაგო ბერნაბეუ;

მთავარი მსაჯი: ხოსე სანჩესი