[პრევიუ] მატჩი, რომელიც ყველაფერს წყვეტს - დღეს საქართველო წლის ბოლო თამაშს ჩაატარებს

ბოლო ტურის წინ, ჩეხეთს 8 ქულა აქვს და ჯგუფის ლიდერია, საქართველოს კი 7 ქულა აქვს და მხოლოდ გამარჯვება სჭირდება, რათა პირველი ადგილი დაიკავოს. თავის მხრივ, მხოლოდ გამარჯვება ჩეხეთსაც სჭირდება, რადგან პარალელურად, ლიდერობის შანსი ალბანეთის ნაკრებსაც აქვს.

უკრაინასთან გამარჯვებით ჩვენთვის ყველაფერი უფრო მარტივდებოდა და დღეს არწაგებაც საკმარისი იქნებოდა, თუმცა რამდენიმე მცდელობის მიუხედავად, ვერ მოვიგეთ და მატჩი 1:1 დასრულდა.

დისკვალიფიკაციის შემდეგ, მოედანს ლაშა დვალი უბრუნდება, რომელსაც სასტარტო შემადგენლობაში უნდა ველოდოთ. სავარაუდოდ, სანიოლი ცვლილებებს შეტევის ხაზშიც გააკეთებს.

როგორც ჩანს, ჩეხებმა დიდი დრო ხვიჩა კვარაცხელიას შესწავლას დაუთმეს, რადგან მატჩისწინა პრესკონფერენციაზე მწვრთნელმაც და ფეხბურთელმაც კვარა გამოარჩიეს.

ვილი სანიოლი (საქართველოს ნაკრების მწვრთნელი): "წინა შეხვედრა ანგარიშით 4:1 მოვიგეთ, თუმცა ახლა სულ სხვა გარემო და დატვირთვაა. იმის შემდეგ 2 თვე გავიდა და ჩეხეთის ეროვნულ ნაკრებში ბევრი რამ შეიცვალა. ჩვენს თავზე უნდა ვიყოთ დამოკიდებული და მაქსიმუმი გავაკეთოთ, რათა კიდევ ერთხელ გავიმარჯვოთ. როცა გავიგეთ, რომ ამ ჯგუფში ვიყავით, თავიდანვე ვიცოდით, რომ რთული თამაშები გველოდა და შემდეგ ეტაპზე გასვლა მარტივი არ იქნებოდა. საგოლე მომენტების შექმნით საქართველო ყველა ნაკრებზე უკეთესია და ფაქტია, ამ კომპონენტში გამორჩეულები ვართ."

ერთა ლიგა, ჯგუფური ეტაპის ბოლო ტური

19 ნოემბერი, 23:45

ანდრუვ სტადიონი, ოლომოუცი

მთავარი მსაჯი: ანასტასიოს პაპაპეტრუ