[პრევიუ] სანახაობრივი და სიურპრიზებით სავსე მატჩის მოლოდინში

დღეს, 20 თებერვალს, ჩვენი დროით 23:55 საათზე, ჩემპიონთა ლიგის მერვედფინალის ფარგლებში დორტმუნდის ბორუსია პსვ ეინდჰოვენს ესტუმრება. განვიხილოთ ყველაფერი საინტერესო და აქტუალური, რაც ამ დუელს ეხება. შეგახსენებთ, აღნიშნული მატჩის პარალელურად, მილანის ინტერი მადრიდის ატლეტიკოს მიიღებს.

ვესტფალიელებს ბუნდესლიგის მიმდინარე სეზონში უწევთ სერიოზული ბრძოლა ჩემპიონთა ლიგის ზონაში ადგილის დამკვიდრებისთვის. ჩემპიონობაზე ფიქრი ფანტასტიკის სფეროა, რადგან ლიდერ ლევერკუზენის ბაიერთან ჩამორჩენა 17 ქულას შეადგენს. გერმანიის ჩემპიონატში ჩატარებული 22 ტურის შემდეგ, "შავ-ყვითლები" 41 ქულით მე-4 პოზიციაზე არიან.

რაც შეეხება ჩემპიონთა ლიგას, სიგნალ იდუნა პარკის ბინადრებმა ე.წ. ნამდვილი "სიკვდილის ჯგუფი" დაძლიეს. პარი სენ-ჟერმენთან ერთად, ამ გუნდმა მილანისა და ნიუკასლ იუნაიტედის ბარიერი გადალახა. ეს ყველაფერი იმის გათვალისწინებით, რომ ამ 4-ეულში პირველ პოზიციაზე სწორედ ედინ ტერზიჩის შეგირდები გავიდნენ.