[პრევიუ] სტადიო ოლიმპიკოზე დიდი ბრძოლა გველოდება: რომა - მილანი

ევროპა ლიგის 1/4 ფინალის განმეორებითი შეხვედრა, სადაც რომა საკუთარ კედლებში მილანს უმასპინძლებს. პირველი მატჩის შემდეგ, დე როსის გუნდს ერთბურთიანი უპირატესობა აქვს, შესაბამისად, წინ დაძაბული ბრძოლა გველოდება. ეს მატჩი სტეფანო პიოლის მომავალსაც გადაწყვეტს, თუ როსონერიმ მომდევნო ეტპაზე გასვლა ვერ მოახერხა, 58 წლის იტალიელი სპეციალისტი, დიდი ალბათობით, სეზონის ბოლოს გუნდს დატოვებს. რაც შეეხება დე როსის, მისი მომავალი თითქმის გარკვეულია, თუმცა თუ ჯალოროსი ევროპა ლიგის ნახევარფინალში გავა, დანიელეს მშვიდად ყოფნა შეეძლება - რომა მას ახალ კონტრაქტს აუცილებლად გაუფორმებს.

ამ მატჩის წინ უდინეზე-რომას შეხვედრა ვიხილეთ, სადაც, სამწუხაროდ, არც ისე კარგ ინციდენტს ჰქონდა ადგილი. მატჩის მიმდინარეობის დროს ევან ნ’დიკა შეუძლოდ გახდა და მისი საავადმყოფოში გადაყვანა გახდა საჭირო. ამის შემდეგ გუნდების კაპიტნებმა და მწვრთნელებმა მატჩის გაგრძელებაზე უარი განაცხადეს. საბედნიეროდ, ფეხბურთელი ახლა თავს კარგად გრძნობს, შეხვედრა კი, დიდი ალბათობით, 1:1-დან გაგრძელდება.

რაც შეეხება მილანს, რომასთან წაგებული მატჩის შემდეგ, პიოლის გუნდმა კიდევ ერთი თამაში ვერ მოიგო. მაპეიზე გამართულ თრილეში მაყურებელმა 6 გატანილი გოლი იხილა, სასუოლო-მილანი ანგარიშით 3:3 დასრულდა. როსონერის არასტაბილური თამაში მთელი სეზონია გრძელდება.