სტამბოლში მიმდინარე პარიზის ოლიმპიური თამაშების ბოლო სალიცენზიო ტურნირზე ბერძნულ-რომაული სტილით მოჭიდავე რამაზ ზოიძემ (67 კგ) პარიზის ოლიმპიური თამაშების ლიცენზია მოიპოვა.
ქართველმა გადამწყვეტ შეხვედრაში ჩინელი ლეი ლი (10-0) დაამარცხა. ნახევარფინალამდე ზოიძემ ნეიტრალური ათლეტის რანგში მოასპარეზე რუს ასლან ვისაიტოვს, შვედ ნიკლას ოელენს და ყაზახ დინ კოშკარს მოუგო.
ქართველებს ხვალ 2 ოლიმპიური ლიცენზიის მოპოვების შანსი აქვთ. იური ლომაძემ (77 კგ) დღეს ნახევარფინალში რუს სერგეი კუტუზოვთან წააგო. ქართველი ხვალ ბრინჯაოს ფინალში იჭიდავებს, გამარჯვების შემთხვევაში მეორე ფინალში მოგებულს შეხვდება და მათ შორის გამარჯვებული ოლიმპიურ ლიცენზიას მოიპოვებს.
ასევე ბრინჯაოს ფინალებში იჭიდავებს ლაშა გობაძე (87 კგ). ქართველმა დღეს ნახევარფინალში აზერბაიჯანელ რაფიგ ჰუსეინოვთან წააგო.
დღეს ოლიმპიადის სალიცენზიო ტურნირზე ასპარეზობას ნაადრევად გამოეთიშნენ ფრიდონ აბულაძე (60 კგ.) და იაკობ ქაჯაია (130 კგ.).
შეგახსენებთ, სალიცენზიო ტურნირის წესების თანახმად, სტამბოლის ტურნირზე ოლიმპიადის ლიცენზიებს თითოეულ წონაში სამ-სამი საუკეთესო მოჭიდავე მოიპოვებს, ფინალისტები და საუკეთესო მესამეადგილოსანი, რომლის ვინაობაც ბრინჯაოს მედლების მფლობელების დამატებით შეხვედრებში გაირკვევა.
შეგახსენებთ, ამ დრომდე, საქართველოს ბერძნულ-რომაული სტილით მოჭიდავეთა ნაკრებიდან ლიცენზია მხოლოდ რობერტ კობლიაშვილს (97 კგ.) ჰქონდა.
თავისუფალი სტილით ჭიდაობაში საქართველოს ამ დროისთვის 3 ლიცენზია აქვს, პარიზის XXXIII ოლიმპიური თამაშების საგზური, გენო პეტრიაშვილს, გივი მაჭარაშვილსა და გოდერძი ძებისაშვილს აქვთ მოპოვებული.
თავისუფალი სტილით მოჭიდავეები სტამბოლში 11-12 მაისს იასპარეზებენ.
საქართველოს ნაკრებიდან ოლიმპიური საგზურისთვის რობერტ დინგაშვილი (57 კგ), ავთანდილ კენჭაძე (74 კგ), და ვლადიმერ გამყრელიძე (86 კგ) იბრძოლებენ.
რამაზ ზოიძემ პარიზის ოლიმპიური თამაშების ლიცენზია მოიპოვა
