ტოტენჰემი პრემიერ ლიგიდან გავარდნის საშიშროების წინაშე დგას. ჩემპიონატში გამართული 29 ტურის შემდეგ, დედაქალაქური გუნდი 29 ქულით არის მე-16 პოზიციაზე და გასავარდნ ზონაში, მე-18 ადგილზე მყოფ მეზობელ ვესტ ჰემს მხოლოდ 1 ქულით უსწრებს. ლონდონელებმა 2026 წელი უბრალოდ კატასტროფულად დაიწყეს.
თავად განსაჯეთ - შვიდი მარცხი და ოთხი ფრე. "მამლებმა" პრემიერ ლიგაში ბოლოს იმარჯვეს გასული წლის დეკემბერში, თანაქალაქელ კრისტალ პალასთან. ინგლისის ჩემპიონატის დასრულებამდე დარჩენილია 9 ტური, ჰოტსპურ სთეიდიუმის ბინადრებს კი ელით შეხვედრები ლივერპულთან, ჩელსისთან, ასტონ ვილასთან, ევერტონთან, ნოტინგემთან, ლიდსთან, სანდერლენდთან, ვულვზთან და ბრაიტონთან.
იგორ ტუდორის შეგირდების მეტოქეებს შორის არის სამი გუნდი, რომელიც იბრძვის ჩემპიონთა ლიგის საგზურისთვის, ასევე სამი გუნდი, რომლის მიზანია ინგლისის უმაღლეს დივიზიონში ადგილის შენარჩუნება. ერთი სიტყვით, მარტივი გასეირნება ტოტენჰემისთვის არცერთი შეხვედრა არ იქნება.
ამ პრობლემების პარალელურად, პრესაში უკვე იწერება ხორვატი მწვრთნელის ლონდონური გუნდიდან გათავისუფლების შესახებ. შეგახსენებთ, "მამლების" ამჟამინდელმა დამრიგებელმა არასრულ 1 თვეში 3/3 შეხვედრა წააგო. პარადოქსია, რადგან ჩვენ ვსაუბრობთ კლუბზე, რომელმაც ლიგის ფაზა ტოპ 4-ში დაასრულა.
დიახ, ჰოტსპურ სთეიდიუმის ბინადრებმა პლეიოფის გარეშე გაიფორმეს ჩემპიონთა ლიგის მერვედფინალის საგზური, სადაც მათი მეტოქე მადრიდის ატლეტიკო იქნება. პირველი შეხვედრა გაიმართება დღეს, საპასუხო კი 18 მარტს.
