საჭირო დროს, საჭირო ადგილას, მაღალი კლასი და შესრულება! - ყველაფერი ახალი ფურცლიდან იწყება

დღევანდელმა გოლმა ყველას ის მიქაუტაძე გაგვახსენა, სულ თავიდან რომ სერაინში გავიცანით - გოლს გოლზე იტანდა და არცერთ გუნდს არ ინდობდა.

მიქაუტაძის ცივსისხლიანი შესრულებები ცოტა ხნით აიაქსის უცნაურმა გადაწყვეტილებებმა დააპაუზა, მაგრამ ჟორჟი არ ნებდება, მეცში ბრუნდება და გოლების გატანას აგრძელებს.

საფრანგეთის ლიგა 1-ში გამართული მატჩი მეცსა და ლიონს შორის, სტუმართა გამარჯვებით, 1:2 დასრულდა, მაგრამ ეს ის მომენტია, როცა მეცის მარცხზე დიდად გული არ დაგვწყდა, რადგან მიქაუტაძემ გოლი გაიტანა. გაიტანა მარტის სანაკრებო მატჩებამდე 1 თვით ადრე.

ამ გოლით ქართველ გულშემატკივარს ნერვიულობა მოეხსნა. მიქაუტაძის სუპერ კლასი არ დაკარგულა და იგი კვლავ ფორმაშია. ეს გოლი მას ძალიან სჭირდებოდა.

სუპერ გოლი, სუპერ შესრულება - მიქაუტაძის მიერ ლიონის კარში გატანილმა გოლმა მისივე გოლი გაგვახსენა კვიპროსის ნაკრების კარში, როცა თამაში იდეალურად წაიკითხა, ჩაჭრაზე წავიდა და ფორვარდულად შეასრულა - ეს მხოლოდ მაღალი დონის თავდამსხმელებს შეუძლიათ.

სიმბოლურია, რომ მიქაუტაძემ ახალი ფურცლის წერა ლიონთან გოლით დაიწყო. კლუბი, სადაც პირველი ნაბიჯები გადადგა და ქალაქი, სადაც აღიზარდა. ვინ იცის, ერთ დღეს, მიქაუტაძე, შესაძლოა, სწორედ ლიონის მაისურით ვიხილოთ.

ამბობენ, ფორვარდს ერთი გოლი სჭირდება, რათა გაიხსნას და შემდეგ თამაშებში კვლავ გაიბრწყინოსო. ხოდა, იმედი ვიქონიოთ, ჟორჟისთვის გამხსნელი სწორედ დღევანდელი გოლი იყო.