ლივერპულის მეკარე, ალისონ ბეკერი არნე სლოტისა და მოჰამედ სალაჰის კონფლიქტს გამოეხმაურა. შეგახსენებთ, რომ მწვრთნელთან უთანხმოების გამო, ეგვიპტელი ფორვარდი მილანის ინტერთან დღევანდელი შეხვედრისთვის მერსისაიდელთა განაცხადს მიღმა დარჩა.
"სალაჰის განცხადებები? რთული ვითარებაა, რადგან მასთან ყველას კარგი ურთიერთობა გვაქვს. ის ლივერპულის ლეგენდა არის. მოჰამედის გვერდით ვთამაშობდი ჯერ კიდევ რომაში, შემდეგ კი მერსისაიდში 8 წლის მანძილზე ერთად ძალიან ბევრს მივაღწიეთ. ეგვიპტელ ფორვარდთან უამრავი დადებითი მოგონება მაკავშირებს.
ვუჭერთ თუ არა მხარს სლოტს? რა თქმა უნდა, ის ხომ ჩვენი მწვრთნელია. ერთად გავხდით პრემიერ ლიგის გამარჯვებულები, მაშინ, როდესაც ბევრი თვლიდა, რომ კლოპის შემდეგ, არნეს ჩემპიონობა გაუჭირდებოდა. თითოეული ჩვენგანი ცდილობს გუნდში იმ მდგომარეობის გამოსწორებას, რაც ახლა არის."
