ერთა ლიგის B დივიზიონის მე-5 ტურში, საქართველოს ნაკრებმა ბათუმში უკრაინა მიიღო — შეხვედრა ფრედ 1-1 დასრულდა. მატჩის შემდეგ, საქართველოს ნაკრების მთავარმა მწვრთნელმა, ვილიო სანიოლმა კომენტარი გააკეთა.
"თამაში გეგმის მიხედვით დავიწყეთ, თუმცა, დებიუტში გაშვებული გოლის შემდეგ გადაწყობა დაგვჭირდა და პირველი ტაიმის კარგად ვერ ჩავატარეთ. მეორე ნახევარში კი ყველაფერი შეიცვალა და ნაკრებმა ჩემი მწვრთნელობის პერიოდში ერთ-ერთ საუკეთესო ტაიმი ითამაშა. თავისი ქვეყნისთვის ყველამ ბოლომდე იბრძოლა და ვფიქრობ, რომ უფრო მეტს ვიმსახურებდით, განსაკუთრებით მეორე ტაიმში."
"ცვლილებაზე შემოსულმა ფეხბურთელებმა თამაშზე დადებითი გავლენა მოახდინეს და ეს იმაზე მეტყველებს, რომ გუნდში საბრძოლო განწყობაა. გოლის გაშვებას მენტალურად ვერ შევეგუეთ და რეაგირებისთვის დრო დაგვჭირდა. რაღაცებს ჯერ კიდევ ვისწავლოთ და მსგავსი პრობლემების გამოსწორება მნიშვნელოვანია. მენტალური სიძლიერის გამომუშავება დროს და ბევრ მუშაობას მოითხოვს."
"მეორე ტაიმში დავინახე, რომ შესვენებაზე ჩემმა საუბარმა შედეგი გამოიღო და გუნდმა უმაღლესი ხარისხი აჩვენა. მეტოქის დაცვის ხაზის გასაწელად, ჩაკვეტაძის ნაცვლად დავითაშვილი შემოვიყვანე და ვფიქრობ, რომ ჩემი დავალება კარგად შეასრულა. დღევანდელ შეხვედრაში ყველა ფეხბურთელი ბოლომდე დაიხარჯა და ძალიან ბევრი ირბინა."
"მოედანზე მხოლოდ 11 მოთამაშე გადის და დღეს არჩევანი კვერკველიაზე შევაჩერე. გოგლიჩიძის ყოფნის შემთხვევაში, შესაძლოა აღნიშნული პოზიცია მას დაეკავებინა, მაგრამ ამ შემთხვევაში ეს მოცემულობა გვქონდა. ერთა ლიგა მსოფლიო ჩემპიონატის საკვალიფიკაციოს მოსამზადებელი ეტაპია, სადაც ბევრი ფეხბურთელი დაგვჭირდება და შესაბამისად, როტაცია მოსალოდნელია."
"წლების წინ საქართველოს ნაკრები ერთა ლიგის D და C დივიზიონებში ასპარეზობდა, დღეს კი A დივიზიონის საგზურისთვის იბრძვის — ეს ყველაფერი იმაზე მეტყველებს, რომ როგორც გუნდი ვიზრდებით და ვვითარდებით. რა თქმა უნდა ამბიცია საჭიროა და მომავალ თამაშში აუცილებლად მოსაგებად ვიბრძოლებთ. A დივიზიონში სათამაშოდ მზად ვართ თუ არა ამაზე საუბარი ამ ეტაპზე უადგილოა. ჯგუფის მოგებაზე მეტად განვითარებასა და გაუმჯობესებაზე ვფიქრობ. ბევრი მიმართულებით უნდა მოვუმატოთ და რაც მთავარია, სწორ გზაზე ვდგავართ" — ვილი სანიოლი.
საქართველოს ეროვნული ნაკრები ერთა ლიგის 2024/25 წლების სეზონის ჯგუფური ეტაპის ბოლო ტურში ჩეხეთს ესტუმრება და გამარჯვების შემთხვევაში, A დივიზიონის საგზურს გაინაღდებს — მატჩი 19 ნოემბერს გაიმართება.
სანიოლი: "ნაკრებმა ჩემი მწვრთნელობის პერიოდში ერთ-ერთ საუკეთესო ტაიმი ითამაშა"
