იქ, სადაც გადამწყვეტი წამებზე უფრო მცირე დროა, იქ, სადაც გამარჯვებას ზოგჯერ მილიწამები განსაზღვრავს და სპორტს ნამდვილ სანახაობად აქცევს. თუ შოუზე და დინამიკაზე ვისაუბრებთ, გულშემატკივართა უმრავლესობას კალათბურთი გაახსენდება. სწორედ სპორტის ამ სახეობის ფუნდამენტური ღირებულებებისა და საზოგადოების მოლოდინის საპასუხოდ დაარსდა საკალათბურთო კლუბი Black Fortress-ი, რომელიც საქართველოს A ლიგაში ასპარეზობს და ლიდერის პოზიციაზეა. გუნდის იდეის, მიზნებისა და სამომავლო გეგმების შესახებ, La Gazzetta dello Sport Georgia-სთან Black Fortress-ის დამფუძნებლებმა, მაიკლ გურიმ და ლევან ბოკერიამ ისაუბრა:
- როდის გაჩნდა Black Fortress-ის დაარსების იდეა?
მაიკლ გური: Black Fortress-ის იდეა ერთ კონკრეტულ დღეს არ გაჩენილა. ის გაჩნდა იმ განცდიდან, რომ ქართულ კალათბურთს აკლდა ის, რაც დიდ სპორტულ კულტურებში არსებობს — ენერგია, შოუ, ატმოსფერო და ძლიერი მოძრაობა თამაშის გარშემო.
ჩვენ ვხედავთ, რომ საქართველოში კალათბურთის მიმართ ინტერესი იზრდება. ეროვნული ნაკრები წარმატებებს აღწევს, ქართველი მოთამაშეები NBA-ში თამაშობენ და სულ უფრო მეტი ბავშვი ირჩევს კალათბურთს, მაგრამ ამავე დროს, ქვეყნის შიდა მატჩებს ხშირად აკლია ის ატმოსფერო, რომელსაც ეს სპორტი ნამდვილად იმსახურებს. სწორედ მაშინ გაჩნდა იდეა, რატომ არ უნდა შევქმნათ კლუბი, რომელიც უბრალოდ გუნდი კი არ იქნება, არამედ კალათბურთის კულტურის ცენტრი, - ასე გაჩნდა Black Fortress-ი.
- რა გზა გაიარა გუნდმა აქამდე?
ლევან ბოკერია: ეს გზა ძალიან სწრაფი და ამავე დროს საკმაოდ რთული იყო. როდესაც ახალი კლუბი იქმნება, მას თავიდან არაფერი აქვს, არც ტრადიციები, არც დიდი ფანბაზა და არც მზად სტრუქტურა. ამიტომ ჩვენ ყველაფერი თითქმის ნულიდან შევქმენით — გუნდი, ბრენდი, მატჩების ატმოსფერო და გულშემატკივრებთან ურთიერთობა.
თავიდანვე გადავწყვიტეთ სხვა გზით გვევლო, არა მხოლოდ კალათბურთის თამაში, არამედ ყოველი მატჩის ნამდვილ მოვლენად ქცევა. დღეს უკვე ვხედავთ, რომ ეს მიდგომა მუშაობს. თუ სუპერლიგის საუკეთესო მატჩებზე საშუალოდ 200–300 ადამიანი დადის. Black Fortress-ის თამაშებზე უკვე დღეს მოდის 2000-ზე მეტი მაყურებელი.
ჩვენ ველოდებით, რომ პლეიოფებზე ჩვენი მატჩები 5–7 ათას გულშემატკივარს მიიზიდავს. ახალი კლუბისთვის ეს ძალიან სერიოზული მაჩვენებელია და ეს ერთ რამეს გვიჩვენებს — საქართველოში კალათბურთის მიმართ ინტერესი დიდია, თუ მის გარშემო სწორ ატმოსფეროს შექმნი.
ამიტომ ჩვენს მატჩებზე არის: შოუ პროგრამა, გათამაშებები და კონკურსები გულშემატკივრებისთვის, აქტიური მუშაობა სოციალურ ქსელებში, ახალგაზრდებისა და ბავშვების ჩართვა და ნელ-ნელა ვხედავთ შედეგსაც — მატჩებზე სულ უფრო მეტი ადამიანი მოდის და სულ უფრო მეტი ხალხი საუბრობს კალათბურთზე. ერთ ფაქტს გამოვყოფდი, რამაც დამაფიქრა, საქართველოს რეგიონებში ადამიანები თავიანთ გუნდებს ხშირად უფრო ხმამაღლა და ერთგულად გულშემატკივრობენ, ვიდრე თბილისში. და მე მაქვს ერთი კითხვა, მართლა შეიძლება ქვეყნის დედაქალაქი რეგიონებზე სუსტად გულშემატკივრობდეს საკუთარ გუნდს?
- რით გამოირჩევა Black Fortress ქართულ კალათბურთში?
მაიკლ გური: ჩვენ ვცდილობთ შევცვალოთ თავად იდეა იმისა, თუ როგორი შეიძლება იყოს სპორტული კლუბი. Black Fortress მხოლოდ გუნდი არ არის, რომელიც მოედანზე თამაშობს. ეს არის: შოუ, კულტურა, კომიუნითი, ემოცია. ჩვენ გვინდა, რომ ადამიანი მატჩზე მოვიდეს არა მხოლოდ შედეგის გამო, არამედ იმიტომ, რომ ეს არის მოვლენა, სადაც დაბრუნება ისევ და ისევ მოუნდება. ჩვენს თამაშებზე ერთდროულად არის სპორტიც, ატმოსფეროც და ცოცხალი ენერგია. ბევრ ქვეყანაში სპორტი ოჯახისთვის დიდი გასართობია. ჩვენი მიზანია, რომ საქართველოშიც კალათბურთი სწორედ ასეთი გახდეს.
- რა არის გუნდის მთავარი მიზანი?
ლევან ბოკერია:ჩვენი მიზანი ბევრად უფრო დიდია, ვიდრე უბრალოდ გამარჯვებები. ჩვენ დარწმუნებულები ვართ, რომ Black Fortress უკვე გახდა ქართული კალათბურთის განვითარების ახალი ეტაპის დასაწყისი. ამ სეზონის დასრულების შემდეგ ჩვენი მედია და entertainment კომპანია Spectra გეგმავს ბაზრის აქტიურ მომზადებას შემდეგი სეზონისთვის. გეგმებში შედის: კალათბურთის რეალითი შოუ, პოდკასტები ცნობილ სტუმრებთან, საერთაშორისო კალათბურთის ბლოგერებისა და ინფლუენსერების ტურნირი. ჩვენი მიზანია, რომ კალათბურთი საქართველოში გახდეს არა მხოლოდ სპორტი, არამედ ძლიერი კულტურული და მედიური მოვლენა. შემდეგი სეზონიდან ჩვენ ვგეგმავთ, რომ ქართული კალათბურთის ლიგების მედია და entertainment მიმართულებას ვმართავდეთ. დარწმუნებულები ვართ, რომ ეს მნიშვნელოვნად გაზრდის ინტერესს კალათბურთის მიმართ.
- A ლიგის სატურნირო ცხრილში დაძაბული მდგომარეობაა. რას გეგმავთ პირველობის შესანარჩუნებლად?
მაიკლ გური:სპორტში მარტივი სეზონები არ არსებობს. წელს A ლიგა ძალიან კონკურენტულია და თითოეული გუნდი მაქსიმალური მოტივაციით გამოდის მოედანზე. ჩვენ ვცდილობთ ძალიან შორს არ გავიხედოთ და ყურადღება თითოეულ მომდევნო თამაშზე გავამახვილოთ. მაგრამ ყველაზე მნიშვნელოვანი ის მხარდაჭერაა, რომელსაც ტრიბუნებიდან ვგრძნობთ. როდესაც მაყურებელი თამაშით ცხოვრობს, გუნდი დამატებით ენერგიას იღებს. ჩვენ ძალიან გვინდა, რომ უფრო და უფრო მეტი ადამიანი მოვიდეს ჩვენს მატჩებზე, რადგან სწორედ გულშემატკივრების ატმოსფერო ქმნის ნამდვილ კალათბურთს.
