ხარებაშვილი უკვე 16 წლის გახდა და ამ ასაკში დინამო თბილისის შეუცვლელი წევრია, რომელსაც მძიმე ტვირთი აქვს და 16 წლის ასაკში გუნდის ერთ-ერთი ლიდერია. აღსანიშნავია, რომ ხარებაშვილი დინამოში 13 წლიდან ირიცხება და იმხელა პროგრესი აქვს, რომ 3 წლის თავზე ძირითად გუნდში თამაშობს.
"მთელი ჩემი ბავშვობა დინამოს თამაშებს ვუყურებდი და ძალიან მინდოდა, რომ ამ გუნდში მეთამაშა. როცა მივხვდი, რომ პროფესიონალურ ფეხბურთში შევაღწიე, ძალიან ბედნიერი ვიყავი და გავაცნობიერე, რომ პასუხისმგებლობა გაიზარდა. დინამოს მწვრთნელები განვითარებაში ძალიან მეხმარებიან. დიდ სათამაშო დროს მაძლევენ და ეს ზრდაში მეხმარება. ვეცდები, წელს გუნდთან ერთად თასი მოვიგო" - განაცხადა ხარებაშვილმა LaGazzetta.ge-სთან.
დინამო თბილისს წელს შეცვლილი პოლიტიკა აქვს. გუნდის 80% ახაგაზრდებითაა დაკომპლექტებული და ამის მიუხედავად, მათ საქართველოს თასის მოგების შანსი აქვთ. 5 დეკემბერს, დინამო ფინალში სპაერს დაუპირისპირდება.
"დინამოს აკადემიაში ძალიან ბევრი ნიჭიერი ფეხბურთელია და სასიამოვნოა, რომ მათ დიდ გუნდში თამაშის საშუალება ეძლევათ. მაგალითად, ვახტანგ სალია, რომელიც ცოტა ხნის წინ ნიუკასლში გაიყიდა. მე და სალია ერთად ბავშვობიდან მოვდივართ. ის სასწაული ადამიანი და სასწაული ფეხბურთელია. ყველანაირი მონაცემები აქვს, რომ პრემიერ ლიგაში ითამაშოს. როცა ჩემი საუკეთესო მეგობარი ნიუკასლში მიდის, დიდი მოტივაციაა, რომ იგივე გავიმეორო. ნიუკასლში რომ გადავიდა, დავურეკე და გავეხუმრე, ნიუკასლის 5 ფეხბურთელი მაინც ჩამომითვალეთქო. მეც მჯერა და თავადაც იმ მოტივაციით ჩადის, რომ იქ გოლებს გაიტანს და თავს დაიმკვიდრებს"
გარდა ტალანტისა, ხარებაშვილს ის თვისებები აქვს, რაც თანამედროვე ფეხბურთის მოთხოვნებს აკმაყოფილებს - მებრძოლი ხასიათი, ბურთის კარგად ცოდნა, ერთბაშად რამდენიმე პოზიციაზე თამაში და ბევრი სხვა.
"ფეხბურთი ძალიან განვითარდა და ფიზიკურ ზრდას დიდ ყურადღებას აქცევენ. ჩემს ასაკში ბევრი მოთამაშე უკვე მაღალ დონეზე თამაშობს. ვცდილობ, ბევრი ვივარჯიშო და ფიზიკურად ყოველდღიურად განვვითარდე. თავს ყველაზე კომფორტულად მარცხენა მცველის პოზიციაზე ვგრძნობ, თან ჩემი საყვარელი ფეხბურთელი მარსელოა, მაგრამ საყრდენ ნახევარმცველადაც მომწონს თამაში. მოთამაშე, რომელსაც მცველადაც შეუძლია თამაში და საყრდენადაც, კიმიხი მახსენდება, თუმცა თანაგუნდელები ოდეგარს მადარებენ"
LaGazzetta.ge-სთან საუბარში დინამო თბილისის მთავარი მწვრთნელი ფერდინანდ ფელდჰოფერი ხარებაშვილის მიმართ საქებარ სიტყვებს არ იშურებს:
ფერდინანდ ფელდჰოფერი: "გასაოცარია თუ როგორ დამაჯერებლად და გამოცდილი მოთამაშესავით თამაშობს იგი. ამ ასაკში ასე მოთამაშე ფეხბურთელი არასდროს მინახავს. მისი დამოკიდებულება საქმისადმი გასაოცარია. საბას უნდა, რომ სულ ვითარდებოდეს და მუდამ ყურადღებით ისმენს ჩვენს ნათქვამს. ასევე მას შეუძლია, რომ ყველა სათამაშო სიტუაცია ისე წაიკითხოს, როგორც ამას გამოცდილი ფეხბურთელები აკეთებენ. ჩემთვის, როგორც მწვრთნელისთვის, უმნიშვნელოვანესია, რომ საბას შეუძლია ჩემი დავალების ზუსტად ისე შესრულება, როგორც ამას ვეუბნები. საკმარისია ერთხელ ავუხსნა და მას უკვე შეუძლია ეს მოედანზე გადაიტანოს. თუკი ჯანმრთელად იქნება და ასე განვითარებას განაგრძობს, დარწმუნებული ვარ ევროპის ტოპ 5 ლიგაში დიდი კარიერა ექნება."
ჩვენივე გავრცელებული ექსკლუზიური ინფორმაციით, ხარებაშვილს ბარსელონა და რეალი აკვირდებიან. პარადოქსია, რომ ხარებაშვილის საყვარელი და საოცნებო კლუბი სწორედ რეალია და ამ კლუბში თამაშსაც უმიზნებს.
"ჩემი მიზანი ტოპ 5 ჩემპიონატში თამაშია. ბავშვობიდან რეალის გულშემატკივარი ვარ და იქ თამაში მსურს. ამჟამად ჩემი პირველი საფიქრალი დინამო თბილისთან ერთად წარმატებული ასპარეზობაა, მომავალში კი ეროვნულ ნაკრებში და დიდ გუნდში თამაში მსურს. მითუმეტეს, კვარა, ზუკა, მამარდა დიდ მოტივაციას მაძლევნ და მათი წყალობით, ახალგაზრდა ფეხბურთელისთვის კარგ გუნდში მოხვედრა გამარტივდა" - დაასრულა ხარებაშვილმა.
გარდაუვალია, რომ თუ ხარებაშვილმა ასე გააგრძელა, მალე ისიც კარგ კლუბში გაიყიდება და მალე ქართულ ფეხბურთს შემდგარი ფეხბურთელი ეყოლება, რომელიც ნაკრებს გამოადგება. თან, საქართველოს ნაკრებს ნომინალური მარცხენა მცველი არ ჰყავს.
