ვილი სანიოლის თანაშემწემ, ადელ ჩედლიმ, ზურიკო დავითაშვილის სენტ-ეტიენში ტრანსფერის შესახებ ისაუბრა. შეგახსენებთ, რომ ახალგაზრდა გარემარბის დებიუტი ვილიარეალთან ამხანაგურ მატჩში შედგა, რომელშიც მან დუბლი შეასრულა და ორი ასისტი გააკეთა.
"ევროპის ჩემპიონატის მიმდინარეობისას ზურიკოს ბევრს ველაპარაკებოდი სენტ-ეტიენის შესახებ. მისი წარმატებული დებიუტი ძალიან გამიხარდა. დავითაშვილი "მწვანეებში" გადასვლის თაობაზე მე და სანიოლმა დავარწმუნეთ, რადგან ვიცით, თუ როგორი განსაკუთრებულია ჩვენი ყოფილი კლუბი. ამის გარდა, "ვერტსს" საფრანგეთში საუკეთესო ფანები ჰყავს.
მჯერა, რომ "წმინდანებს" ქართველი გარემარბი გამოადგებათ, ისევე როგორც თავად ფეხბურთელს გამოადგება ამ გუნდში ყოფნა. მოუთმენლად ველი, თუ როდის ვიხილავ სენტ-ეტიენის ახალწვეულ ვინგერს ლიგა 1-ის ახალ სეზონში", - განაცხადა ტუნისელმა დამრიგებელმა.
