+10 ქულა მეორე ადგილთან! ალონსოს გუნდი შეუჩერებელია

ბუნდესლიგის 24-ე ტურში გათამაშების ლიდერისა და ერთ-ერთი აუტსაიდერის დაპირისპირება ვიხილეთ. კიოლნი საკუთარ კედლებში ალონსოს ლევერკუზენს დაუხვდა.

მატჩი სტუმარი გუნდისთვის კარგად დაიწყო, შეხვედრის მე-14 წუთზე ტილმანი უხეშობისთვის გააძევეს. მასპინძელი გუნდს 75 წუთი 10 კაცით მოუწია თამაში. ამ ყველაფერს ლევერკუზენის გოლიც მალევე მოჰყვა, გუნდის ერთ-ერთმა გამორჩეულმა ფეხბურთელმა, ფრიმპონგმა თავი კიდევ ერთხელ გამოიჩინა. ნიდერლანდელმა 38-ე წუთზე საკუთარი გუნდი წინ გაიყვანა.

მეორე ტაიმში ალონსოს გუნდმა მეტოქეს კიდევ ერთი გოლი გაუტანა, ამჯერად, თავი მეორე ფლანგის მცველმა, გრიმალდომ გამოიჩინა. ესპანელისთვის ეს სეზონში, მე-9 გატანილი გოლი იყო. "ფარმაცევტებმა" მატჩი ბოლომდე მშვიდად მიიყვანეს და მორიგი 3 ქულა ჩაიწერეს. ბაიერნთან უპირატესობა 10 ქულამდე გაიზარდა, ლევერკუზენი სრული სვლით წინ მიიწევს.