18 წლის მეინუმ დრამატულ შეხვედრაში მანჩესტერს მოაგებინა

პრემიერ ლიგის 22-ე ტურში საოცარი მატჩი ვიხილეთ. ვულვზი საკუთარ მოლინეუზე მანჩესტერ იუნაიტედს მასპინძლობდა. შეხვედრა სტუმარი გუნდისთვის კარგად დაიწყო, 22-ე წუთზე ტენ ჰაგის გუნდი უკვე 0-2 იგებდა. გატანილი გოლების ავტორები მარკუს რაშფორდი და რასმუს ჰოილუნი გახლდათ.

მეორე ტაიმი ო'ნილის შეგირდებმა ბევრად კარგად დაიწყეს და 71-ე წუთზე სხვაობა ერთ ბურთამდე შეამცირეს, სარაბიას გატანილი პენალტი და 1-2. თუმცა ამას მალევე "წითელი ეშმაკების" პასუხი მოჰყვა, მატჩის 75-ე წუთზე, შეცვლაზე შემოსულმა სკოტ მაკტომინეიმ სეზონში მე-6 გოლი გაიტანა და გუნდს ორ ბურთიანი უპირატესობა დაუბრუნა.

შემდეგ კი ვიხილეთ მატჩის საუკეთესო წუთები - 85-ე წუთზე ვულვზის კაპიტანმა მაქს კილმანმა ანგარიში კვლავ შეამცირა, 2-3, შემდეგ კი პედრო ნეტუს დრო დადგა. "მგლების" ლიდერმა დამატებულ 95-ე წუთზე ანგარიში გაათანაბრა.

შეხვედრის დასრულებამდე სულ რამდენიმე წამი იყო დარჩენილი, როდესაც მანჩესტერის 18 წლის ტალანტმა კობი მეუნიმ, მასპინძლების საჯარიმოსთან შესანიშნავი დრიბლინგი წამოიწყო და ძალიან ეფექტურადაც დაარტყა, ჟოზე სა ვერაფერს გახდა და ანგარიში 3-4 გახდა, მანჩესტერი კვლავ წინ გავიდა!

ამ გოლიდან რამდენიმე წამში კი შეხვედრის მთავარმა არბიტრმა, ჟარედ ჟილეტმა მატჩი დაასრულა. ტენ ჰაგის გუნდი სახლში უმნიშვნელოვანესი 3 ქულით ბრუნდება.

ამ გამარჯვებით "წითელი ეშმაკები" სატურნირო ცხრილში დაწინაურდნენ და მე-7 ადგილზე გადავიდნენ. ოთხეულთან ჩამორჩენა 8 ქულამდე შემცირდა.