როგორც აღვნიშნეთ, ეს ყველაფერი ხდებოდა ევროპის 2012 წლის ჩემპიონატის საკვალიფიკაციო ეტაპზე, სადაც ჯგუფში "ჯვაროსნებისა" და ბალკანელების გარდა, განთესილები იყვნენ საბერძნეთი, ისრაელი, ლატვია და მალტა. თემურ ქეცბაიას გუნდს როგორც წარმატებული, ისე წარუმატებელი მომენტებიც ჰქონდა, მაგრამ ყველაზე გამორჩეული მაინც "მოჭადრაკეებთან" მოგებაა.
თეთრ-წითელ მაისურებში შემოსილმა ჩვენებმა გაიმარჯვეს მალტასთან, ითამაშეს ფრე საბერძნეთთან, ისრაელსა და ლატვიასთან. ცხადია, ევროპის ჩემპიონატზე გასასვლელად ეს არ იყო საკმარისი და საქართველოსთვის ექს-იუგოსლავიელებთან მატჩიც მნიშვნელოვნად არაფერს წყვეტდა, მაგრამ სტუმრებს ამ წაგებამ ჯგუფში საქმე გაურთულა.
ჩვენი ნაკრების იმდროინდელი შემადგენლობა ასეთი იყო: რევიშვილი, ამისულაშვილი, ხუბუტია, სალუქვაძე, კალაძე, ხიზანიშვილი, დაუშვილი, კანკავა, კობიაშვილი, იაშვილი, დვალიშვილი. შეცვლაზე შემოვიდნენ სირაძე, მარცვალაძე და გოგუა. როგორც აღვნიშნეთ, "ჯვაროსნებს" იმ დროს თემურ ქეცბაია ხელმძღვანელობდა.
ხორვატიის შემადგენლობა: რუნიე, ჩორლუკა, ლოვრენი, სტრინიჩი, სრნა, დუიმოვიჩი, რაკიტიჩი, მოდრიჩი, კრანჩარი, პეტრიჩი, კალინიჩი. სათადარიგოთა სკამიდან შემოვიდნენ პერიშიჩი, იელავიჩი, პრანიჩი. მწვრთნელი: სლავენ ბილიჩი. ბალკანელები ფავორიტები იყვნენ და მატჩიც მათი კარნახით მიმდინარეობდა, მაგრამ ყველაფერი ერთმა მომენტმა გადაწყვიტა.
90-ე წუთი, თეთრ-წითელში შემოსილი მასპინძლები იწყებენ შეტევას - კალაძე, კანკავა, მარცვალაძე, პასი კობიაშვილზე და 1:0, გოლ! "მოჭადრაკეების" კარებში ზუსტად წასული ერთადერთი დარტყმა ქეცბაიას გუნდის გატანილი გოლით დასრულდა. ზეიმობდა არა მხოლოდ მთელი დინამო არენა, არამედ მთელი ქვეყანა!
იმავე დღეს, 13 წლის შემდეგ, კიდევ ერთი შეხვედრაა და ამჯერად, საქართველოს ევროპის ჩემპიონატამდე მხოლოდ ერთი ნაბიჯი აშორებს. ამისთვის, საბერძნეთთან მოგებაა საჭირო. დიახ, ეს არის ჩვენი ნაკრების ერთ-ერთი ყველაზე უხერხული მეტოქე და სტატისტიკა ნამდვილად მათ მხარესაა, მაგრამ ციფრები ამ შემთხვევაში, მეორე ხარისხოვანია, უბრალოდ წინ, დიდი გამარჯვებისკენ!
