საქართველოს ფეხბურთის ფედერაცია 23 მარტამდე ყველა ღონისძიებას აჩერებს, შესაბამის განცხადებას სფფ ავრცელებს:
"საქართველოს ფეხბურთის ფედერაციის მიერ, საფეხბურთო კლუბებსა და პარტნიორ ორგანიზაციებთან კონსულტაციის შედეგად მიღებული გადაწყვეტილებით, ქვეყანაში გამოცხადებულ გლოვის დღეებთან დაკავშირებით, 23 მარტამდე დაგეგმილი ყველა საფეხბურთო ღონისძიება დროებით შეჩერებულია.
აღნიშნული გადაწყვეტილების შესაბამისად, სფფ-ის ეგიდით მიმდინარე ჩემპიონატებში ამ პერიოდში დაგეგმილი ყველა მატჩი გადაიდო. მათი ჩატარების განახლებული თარიღები მოგვიანებით გამოცხადდება.
საფეხბურთო ოჯახის სახელით, კიდევ ერთხელ ვუთანაგრძობთ ქართულ მართლმადიდებლურ ეკლესიას და სრულიად საქართველოს," - არნიშნული სფფ-ის განცხადებაში
LaGazzetta.ge ღრმა მწუხარებას გამოხატავს, საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, ილია მეორის გარდაცვალების გამო. ვუსამძიმრებთ სრულიად საქართველოს.
