ხვიჩა კვარაცხელია ზამთარში ნაპოლის დატოვების შემდეგ, პარის სენ-ჟერმენთან ერთად ჩემპიონთა ლიგის გამარჯვებული გახდა. საინტერესოა, ქართველი ვინგერის გარდა, რომელმა მოთამაშეებმა შეძლეს ევროპის ყველაზე პრესტიჟული საკლუბო ტურნირის მოგება "პარტენოპეის" დატოვების შემდეგ?
20-ე საუკუნეში ასეთი ფეხბურთელების რიცხვი საკმაოდ ბევრი იყო. "აძურის" ყოფილი მოთამაშეები ჰყოლია 1960-იანების ინტერს, ასევე 1990-იანების როგორც მილანს, ისე იუვენტუსსაც. 21-ე საუკუნეში კი ასეთი შემსრულებლების რაოდენობამ საგრძნობლად იკლო. პირველმა, რომელმაც მთავარი საკლუბო ტურნირი მოიგო სან პაოლოს ბინადრების დატოვების შემდეგ, მარეკ იანკულოვსკი არის.
ჩეხი მარცხენა მცველი ნაპოლიში თამაშობდა 2000-2002 წლებში, 2005-ში კი ის გადავიდა მილანში, რომელთან ერთადაც 2007 წელს მან ჩემპიონთა ლიგა მოიგო. გავიდა ერთ ათწლეულზე მეტი და შემდეგი მოთამაშე, რომელმაც "პარტენოპეის" დატოვების შემდეგ მოიგო მთავარი საკლუბო ტურნირი, ჟორჟინიო ფილიო არის.
იტალიელმა ნახევარმცველმა ეს გააკეთა 2021 წელს, ლონდონის ჩელსისთან ერთად. საქართველოს ნაკრების ლიდერზე უკვე ვისაუბრეთ და არ უნდა დაგვავიწყდეს, რომ მასთან ერთად მთავარი საკლუბო ტურნირი მოიგო ფაბიან რუისმა, რომელიც "აძურიში" 2018-2022 წლებში თამაშობდა.
