4 თასის ფინალი ერთ დღეს! - მანჩესტერული დერბი, ძველი ფირმა, კვლავ ლევერკუზენი და მბაპეს ბოლო მატჩი

სიტიმ იმარჯვა პრემიერ ლიგაში, იუნაიტედმა კი ასპარეზობა მერვე ადგილზე დაასრულა. ეს ამ გუნდისთვის ბოლო შანსია, რომ სეზონი ჩაამთავროს თუნდაც ერთი მოგებული ტიტულით. როგორც ცნობილი ხდება, ამ მატჩის შემდეგ "წითელი ეშმაკები" ერიკ ტენ ჰაგს გაათავისუფლებენ. მის შემცვლელად მოიაზრებიან ტომას ტუხელი, მაურისიო პოჩეტინო და კირან მაკენა.

ლევერკუზენი გერმანიის თასის ფინალს დაუმარცხებელის სტატუსით აღარ ხვდება. 51-თამაშიანი რეკორდული სერიის შემდეგ, ამ გუნდმა ევროპა ლიგის ფინალში ბერგამოს ატალანტასთან წააგო. ბაიერს ტრებლის მოგების გეგმა ჩაეშალა, მაგრამ შესაძლებელია სეზონის ორი ტიტულით დასრულებაც. მეტოქე, საიურპრიზების მოყვარული კაიზერია.

ეს იქნება კილიან მბაპეს ფინალური თამაში პარის სენ-ჟერმენის მაისურით. მიმდინარე სეზონში ყველაფერი სტანდარტული სცენარით წარიმართა - კრახი ჩემპიონთა ლიგაზე და ტრიუმფი ლიგა 1-ში, ეს პსჟ-ს სტატისტიკაა. რაც შეეხება ლიონს, სეზონის უმძიმესად დაწყების შემდეგ, ამ გუნდმა მე-6 პოზიციამდე დაწინაურება შეძლო. ვნახოთ, შეძლებს თუ არა ოლიმპიკი სეზონის ტიტულით დასრულებას.

კიდევ ერთი თასის ფინალი - ძველი ფირმის დერბი. ჩემპიონატის გამარჯვებულად მოგვევლინა სელტიკი, რომელმაც პრინციპულ მოწინააღმდეგეს რვა ქულით გაასწრო. შოტლანდიის თასის მოგებით, რეინჯერსი ერთგვარი რევანშის აღებას ეცდება. ფავორიტად მოიაზრებიან "კელტები", მაგრამ ამ დუელში ყველაფერი შეიძლება მოხდეს.