ჩემპიონთა ლიგის პირველ ნახევარფინალურ მატჩში ბაიერნ მიუნხენი პარის სენ-ჟერმენთან ანგარიშით 4:5 დამარცხდა. ეს არის პირველი შემთხვევა 21-ე საუკუნეში, როცა "რეკორდმაისტერმა" ევროპის მთავარი საკლუბო ტურნირის 1 შეხვედრაში 5 ბურთი გაუშვა. როგორც ვხედავთ, პსჟ-მ ახალი რეკორდი დაამყარა.
ზოგადად ჩემპიონთა ლიგის ისტორიაში კი მსგავსი ფაქტი აქამდე დაფიქსირდა მხოლოდ ერთხელ - 1994/1995 წლების სეზონის ნახევარფინალში, როცა ჯოვანი ტრაპატონის შეგირდებმა 2:5 ამსტერდამის აიაქსთან წააგეს. პირველ შეხვედრაში იყო უგოლო ფრე, საპასუხოში კი სწორედ აღნიშნული ანგარიში.
ოლიმპიაშტადიონის ბინადრებს ორი გოლი გაუტანა იარი ლიტმანენმა, ასევე თითო ბურთი მარკ ოვერმარსმა, რონალდ დე ბურმა და ფინიდი ჯორჯმა შეაგდეს. ბაიერნის ბარიერის გადალახვის შემდეგ, "ებრაელებმა" ევროპის მთავარი საკლუბო ტურნირის ფინალში მოგვიანებით მილანსაც მოუგეს.
ეს იყო იოჰან კრუიფ არენას ბინადრების მეოთხე და ჯერჯერობით ბოლო ჩემპიონთა ლიგის ტიტული. გავიდა 31 წელი და ხუთი გოლი მიუნხენელთა კარში უკვე "ლურჯ-წითლებმა" შეაგდეს. ვნახოთ, შეძლებენ თუ არა ისინი ევროპის მთავარი საკლუბო ჯილდოს ზედიზედ მეორედ მოგებას.
