გიორგი ქოჩორაშვილმა ჩემპიონთა ლიგაზე თავის სადებიუტო მატჩში საგოლე გადაცემა გააკეთა. შეგახსენებთ, რომ ლისაბონის სპორტინგმა 4:1 გაანადგურა ალმათის ქაირათი, ლევანტეს ყოფილი შუახაზელის ქუსლით პასს კი მასპინძელთა მე-2 ბურთი მოჰყვა. ის გახდა რიგით მე-5 ქართველი მოთამაშე, რომელმაც ლიგის სადებიუტო შეხვედრაში შედეგიანი ქმედება განახორციელა.
პირველები იყვნენ ალექსანდრე ჩივაძე და რამაზ შენგელია, როდესაც ჩემპიონთა თასის 1979/1980 წლების სეზონში თბილისის დინამომ 1:2 ლივერპულთან წააგო. "ლურჯ-თეთრების" ის ერთადერთი ბურთი გავიდა მათი აქტიურობის შედეგად და როგორც აღვნიშნეთ, ეს იყო ქართველი მოთამაშეების ლიგაზე გამოჩენის პირველი შემთხვევა.
მე-20 საუკუნის მიწურულს ჩემპიონთა ლიგის სადებიუტო მატჩში შედეგიანი ქმედება მიითვალა კახა კალაძემ - 1998/1999 წლების სეზონი, კიევის დინამო აგებს ათენის პანათინაიკოსთან, ქართველი უკანახაზელი კი ასისტს აკეთებს. თანამედროვე ეპოქაში კი ასეთი გვხვდება 2 მოთამაშე: ხვიჩა კვარაცხელია და "ლომების" მე-14 ნომერი, რომელზეც უკვე ვისაუბრეთ.
რაც შეეხება პარის სენ-ჟერმენის გარემარბს, მისი დებიუტი ჩემპიონთა ლიგაზე შედგა ნაპოლის შემადგენლობაში, მერსისაიდელების წინააღმდეგ. "პარტენოპეიმ" "წითლები" გაანადგურა 4:1, ქართველმა ვინგერმა კი ასისტი მიითვალა.
ქართველი ფეხბურთელები შედეგიანი ქმედებით ჩემპიონთა ლიგის სადებიუტო მატჩში
| ფეხბურთელი | მატჩი | ქმედება | თარიღი |
| რამაზ შენგელია | ლივერპული 2:1 დინამო თბილისი | ასისტი | 19/09/1979 |
| ალექსანდრე ჩივაძე | ლივერპული 2:1 დინამო თბილისი | გოლი | 19/09/1979 |
| კახა კალაძე | პანათინაიკოსი 2:1 დინამო კიევი | ასისტი | 16/09/1998 |
| ხვიჩა კვარაცხელია | ნაპოლი 4:1 ლივერპული | ასისტი | 07/09/2022 |
| გიორგი ქოჩორაშვილი | სპორტინგი 4:1 ქაირათი | ასისტი | 18/09/2025 |
