კეპა არისაბალაგა ჩელსიდან გადადის არსენალში, სადაც ის დავიდ რაიას დუბლიორი იქნება. ტრანსფერის ღირებულება - ხუთი მილიონი ფუნტი. იყო დრო, როდესაც ესპანელი გოლკიპერი თავის პოზიციაზე იყო ყველაზე ძვირადღირებული, როდესაც 2018 წელს, ბილბაოს ატლეტიკიდან ლონდონურ კლუბში გადადიოდა.
აღსანიშნავია, რომ "არისტოკრატების" მეკარემ მოხსნა ალისონ ბეკერის რეკორდი, რომელიც მის ტრანსფერამდე სამი კვირით ადრე, რომადან ლივერპულში 70 მილიონი ევროს სანაცვლოდ გადავიდა. დიახ, ბრაზილიელი გოლკიპერის რეკორდმა გასტანა სულ რაღაც 20 დღე (19 ივლისი-8 აგვისტო), შემდეგ კი სტემფორდის ბინადრებმა ბასკთა 1 ნომერი გაიფორმეს.
რა მოხდა შემდეგ? 30 წლის მეკარემ ვერ მოახერხა ჩელსიში ადაპტაცია და მას მოუწია იჯარით წასვლა, თავდაპირველად რეალ მადრიდში, შემდეგ კი ბორნმუთში. როგორც აღვნიშნეთ, კეპა ძალიან მალე გახდება სხვა ლონდონური კლუბის მოთამაშე, იმაზე თითქმის 14-ჯერ უფრო დაბალ ფასად, ვიდრე ის თავის დროზე "არისტოკრატებში" გადავიდა.
შეგახსენებთ იმასაც, რომ ესპანელი მეკარის რეკორდი დღემდე ხელშეუხებელია. დიახ, მის "ლურჯებში" ტრანსფერიდან გავიდა შვიდი წელი, მაგრამ 80 მილიონზე მეტი გოლკიპერში სხვას არავის გადაუხდია. ვნახოთ, როგორი იქნება არისაბალაგას თავგადასავალი ამჯერად "მეთოფეებში".
