რეალ მადრიდში მომდევნო სეზონისთვის მზადება უკვე დაიწყეს. მას შემდეგ, რაც გუნდი ჩაბი ალონსომ დატოვა, მთავარი მწვრთნელის პოსტი ალვარო არბელოამ ჩაიბარა. მხარეებს შორის ხელშეკრულება სეზონის ბოლომდე გაფორმდა, თუმცა თუ რეალმა მიმდინარე სეზონში გარკვეულ წარმატებას მიაღწია, არის შანსი 43 წლის სპეციალისტი სამეფო კლუბში მომდევნო სეზონშიც დარჩეს.
იმის მიუხედავად, რომ სეზონის მეორე ნახევარი წინაა, კლუბში ალვარო არბელოას პოტენციურ შემცვლელებზე მაინც ფიქრობენ. დადასტურებულად შეგვიძლია იმის თქმა, რომ ფლორენტინო პერესისა და მთლიანი ბორდის ოცნება იურგენ კლოპია, რომელიც ამ დრომდე რედ ბულის ორგანიზაციაში მუშაობს და თავს საკმაოდ კარგად გრძნობს. იმის მიუხედავად, რომ გერმანელი სამწვრთნელო კარიერის განახლებას ჯერ არ გეგმავს, რეალ მადრიდში ყველაფერს გააკეთებენ, რომ 58 წლის სპეციალისტი სამეფო კლუბში მუშაობაზე დაითანხმონ.
რაც შეეხება კიდევ ერთ კანდიდატურას, რომელიც რეალ მადრიდში ძალიან მოსწონთ — მისი სახელი უნაი ემერია! დიახ, სამეფო კლუბში ფიქრობენ, რომ ესპანელი სპეციალისტი საკმაოდ ძლიერია და თუ იურგენ კლოპთან შეთანხმება ვერ მოხერხდება, სწორედ ის იქნება გეგმა B. შეგახსენებთ, უნაი ემერის ასტონ ვილასთან არსებული კონტრაქტი 2029 წლამდე აკავშირებს, შესაბამისად, ბირმინგემელებთან შეთანხმების მიღწევა არც ისე მარტივი იქნება.
სიაში ვხვდებით ენცო მარესკასაც, თუმცა იტალიელი სამეფო კლუბის მთავარი სამიზნე ამ მომენტისთვის არაა. უახლოეს თვეებში როგორც ალვარო არბელოას, ისე მომავალი პოტენციური მთავარი მწვრთნელის საკითხიც დიდი ალაბთობით გაირკვევა.
