დასრულდა ჩემპიონთა ლიგის მერვედფინალური დაპირისპირებები, რომელშიც გავიდა 68 გოლი, რაც ამ ტურნირის აღნიშნული სტადიის ახალი რეკორდია. წინა რეკორდი დაფიქსირდა 2016/17 წლების სეზონში, როცა 1/8 ფინალში 62 ბურთი გავიდა. გავიხსენოთ ყველაზე შედეგიანი დუელები.
პირველ რიგში გამოსარჩევია ბარსელონას ლეგენდარული ქამბექი პარის სენ-ჟერმენთან - 0:4-ის შემდეგ, 6:1. ამ დუელში გავიდა 11 გოლი, მაგრამ იყო წყვილები უფრო უხვგოლიანი შედეგებითაც. მიუნხენის ბაიერნმა შინ და სტუმრად გაანადგურა ლონდონის არსენალი (5:1, 5:1) და ფეხბურთის მოყვარულებს 12-ბურთიანი სანახაობა აჩუქა.
ასევე 12 გოლი გავიდა მანჩესტერ სიტისა და მონაკოს დაპირისპირებაშიც (5:3, 1:3). რაც შეეხება ახალ რეკორდს, გვხვდება ორი წყვილი 12-ბურთიანი შედეგით: კვლავ "რეკორდმაისტერი", ამჯერად ატალანტას განადგურებით (6:1, 4:1), ასევე ატლეტიკოსა და ტოტენჰემის დუელიც (5:2, 2:3).
კატალონიური გუნდისა და ნიუკასლ იუნაიტედის დაპირისპირებაში გავიდა 11 გოლი (7:2, 1:1), ჩელსი კი პსჟ-სთან 10-გოლიან დაპირისპირებაში განადგურდა (2:5, 0:3). რაც შეეხება ევროპის მთავარი საკლუბო ტურნირის ყველაზე შედეგიანი სტადიის ყველაზე შედეგიან მოთამაშეებს: ხვიჩა კვარაცხელია, ფედერიკო ვალვერდე და ხულიან ალვარესი, 3 ბურთი.
როგორც ვხედავთ, ქართველმა შემტევმა თავის ანგარიშზე დააფიქსირა მორიგი მიღწევა - ჩემპიონთა ლიგის ყველაზე უხვგოლიან მერვედფინალში მასზე მეტი არავის გაუტანია. აქვე დავამატებთ, "ლურჯ-წითლების" ვინგერი არის ერთადერთი ქართველი მოთამაშე, რომელმაც ლონდონელთა კარის აღება შეძლო.
